Ævintýri í Lopasokkalandi

jæja þá.....

2008-04-03T14:28:00.002+02:00

.. veit ég ekki alveg hvernig þetta blogg á að virka núna enda okkar ævintýri í Lopasokkalandi í pásu fram að áramótum. Eins og flestir vita mun Viktor sparka í knöttinn í vesturbænum í sumar og við ásamt frumburði komin heim í bili. Íbúðin í Lilleström komin á leigu og dótið allt í geymslu.
Nú er svo komið á hreint að við litla fjölskyldan munum vera búsett á Hörpugötu á meðan þessar tilfæringar standa yfir. Lítil og sæt kjallaraíbúð í æðislegu hverfi. Við mægður verðum lausar og liðugar í sumar og pabbinn ætlar að vinna smá fyrir hádegi með boltanum en vera mest í fríi með okkur.

Veit ekki aveg hvernig ég mun haga þessu bloggi héðan af..... þar sem við erum ekki lengur langt í burtu frá fjölskyldu og vinum. Þótt að ævintýri lopasokkalands eru á "hold" þá er nýtt og ennþá meira ævintýri hafið hjá okkur báðum en uppeldi Höllu Elísabetar er mikið og stórt hlutverk fyrir nýbakaða foreldra. Kannski mun þessi bloggsiða fjalla um okkar afrek á þeim bænum.....

sjáum til

Við kynnum til leiks...

2008-03-28T15:12:00.002+01:00

Höllu Elísabetu Viktorsdóttur
Skírð þann 22. mars ´08

kveðja stoltir foreldrar

Komnar heim

2008-02-21T16:58:00.004+01:00

Við mæðgur erum lentar á Fróni. Mamman í fyrsta sinn í 8 mánuði og dóttirin í fyrsta sinn á sinni stuttu ævi. Sú stutta var algjört fyrirmyndabarn á leiðinni og áhyggjur móðurinnar yfir flugferðinni óþarfar. Það var ekki fyrr en beðið var eftir farangrinum á Leiðstöð sem litli apakötturinn okkar byrjaði að þenja lungun sín og hætti ekki fyrr en hún var komin út í bíl.

Erum báðar mjög glaðar með að vera komnar heim í faðm fjölskyldunnar og vonum að pabbinn geti komið til okkar í bráð.

Ein vika...

2008-01-31T20:46:00.000+01:00

...er liðin síðan þessi unga dama kom í heiminn!
Flottust!!

Smá mont...

2008-01-26T23:03:00.000+01:00

Sæt feðgin á fyrstu klukkutímum dömunnar í þessum heimi...

ástarkveðjur til ykkar frá nýbökuðum foreldrum

Noregsbarn Viktorsdóttir

2008-01-25T15:34:00.000+01:00

Jæja þá er prinsessan loksins komin. Hún er 3,39kg og er 49cm.
Farið endilega á barnaland.is því þar eru fleirri myndir væntanlegar, innan klst.

Aldarfjórðungur

2008-01-22T10:29:00.000+01:00

... er síðan þessi ungi drengur fæddist...
25 ár

Húrra húrra húrra húúúúrrraaaaaaaaaaa.....!!!!!!!!

Góðir hlutir gerast hægt

2008-01-20T20:29:00.000+01:00

..... tikk takk...
.....tikk takk....
....tikk takk....

Tifandi tímaspengja...

2008-01-08T01:32:00.000+01:00

Þó svo að litli álfurinn í maganum hafi fengið sér síðu þá ætla ég ekki að hætta að skrifa hér fréttir af búsetu okkar í Norge. Þó að við gerum okkur fulla grein fyrir að tilvonandi frumburður sé mun meira spennandi, þá er gott losa úr hugarvitunum smá krass á blað um veru okkar í útlöndum og ég tala nú ekki um sem nýbakaðir foreldrar.
Alveg glænýtt efni í reynslubankann að fara að bætast við.

Nú erum við búin að vera búsett hér í Lilleström i heilt ár! Fyrir einu ári lentum við skötuhjúin í skítakulda og frosti, grunlaus um hvaða viðburðarríki tími væri framundan. Aldrei datt mér þá í hug að ég mundi vera í þessum sporum að ári liðnu. Lífið kemur manni skemmtilega á óvart og tíminn flýgir áfram... þó að mér finnist hann fara á sniglahraða ákkurat í augnablikinu.

Þessir dagar núna eru skrýtnir... ég er eins og tifandi tímasprengja...... alveg fáranleg tilfinning! Viktor greyið stekkur til í hvert skipti sem ég gef frá mér hljóð og ég er vör um allar breytingar á líkama mínum. Hvernig veit maður hvenær barnið er að koma þegar maður hefur aldrei upplifað það áður?
Leiði hugann stundum að sögum um konur sem fæddu á eldhúsgólfinu heima hjá sér, af því að þær náðu ekki á spítalann, eða um þessa sem fæddi barnið sitt í klósettið.... hún vissi ekki einu sinni að hún væri ólétt!! Ég hef ekki löngun til að bætast í hóp með þessum konum...

Já þetta eru mínar hugleiðingar á síðustu dögum meðgöngunnar.... síðasti spretturinn í maraþoninu er alltaf erfiðastur.... þá fer þreytan að síga á mann!

kveðjur yfir hafið

Ný síða.....

2008-01-05T18:06:00.000+01:00

Jæja kæra fólk.. já ennþá ekkert að gerast þrátt fyrir kraftgöngur húsfreyjunnar síðustu daga

En í þessari miklu bið höfum við gert smá myndasíðu fyrir litla þrjóska bumbuálfinn okkar. Síðan er ennþá í bígerð en við erum búin að setja inn nokkrar myndir... þó auðvitað mun síðan fyrst komast í gagnið þegar frökenin ákveður að koma í heiminn!
Þá ætlum við að vera súper dugleg að setja inn myndir og VIDEO..... því við fengum svo fína vél í jólagjöf til að festa ógleymanleg augnablik á filmu fyrir fjarlæga ættingja og vini.

Slóðin á síðuna er www.viktorsbarn.barnaland.is ... sendið okkur bara mail til að fá lykilorðið!!
varnarsson@mac.com
alfrun.pals@gmail.com
endilega kíkjið....

kærar kveðjur

Allt með kjurrum kjörum á nýju ári

2008-01-03T12:19:00.000+01:00

Gleðilegt ár allir saman og takk fyrir allt gamallt og gott!!

Nú erum við bara tvö í kotinu á ný eftir velheppnuð hátíðarhöld með Höllu Guðrúnu og Gísla Arnari. Þau dekruðu við okkur og hef ég sjaldan borðar jafn mikið af jólamat yfir hátíðarnar. Bæði ég og litli álfurinn í maganum döfnuðum því vel um jólinn á meðan Viktor er bara búinn að léttast... enda mjög duglegur að nýta tímann í fríinu til að æfa vel og halda sér í formi fyrir næsta tímabil sem senn fer að hefjast!

Áramótin voru rosalega notaleg hér í Norge og norrmenn komu okkur í opna skjöldu með sprengjugleði sinni á miðnætti en öfugt við Ísland þá heyrðist varla í flugeldum fyrir þann tíma. Reyndar kom síðan í ljós að þessi áramót eru þau síðustu þar sem almennningi hér gefst kostur á að kaupa flugelda til einkanota. Á næsta ári verða skipulagðar flugeldasýningar í staðinn enda norrmenn að beina sjónum sínum að umhverfisvernd og öryggi hins almenna borgara með þessari ákvörðun. Hvar ætli Ísland standi í þessari umræðu? eða er þetta umræða yfirhöfuð á klakanum?

Sú stutta er að láta fara vel um sig í maganum þó að plássið fyrir hana sé að minnka svo um munar enda daman orðin tæp 3 kg. í fyrradag fór ég hins vegar að fá verki og samdrætti og eftir símtal við fæðingardeildina vorum við beðin um að koma upp eftir. Þar tóku við miklar skoðanir og sögðu læknarnir að þetta væri barn sem vildi bráðum fara að komast í heiminn. Ljósmæðurnar voru í hláturskasti yfir látunum í álfinum í sónarskoðuninni en sú stutta ákvað að veifa og kinka kolli í gríð og erg okkur til skemmtunar. En þar sem vatnið var ekki farið og fæðingardeildin ekki beint staður sem maður vill eyða mörgum klukkutímum á kusum við að fara aftur heim og bíða eftir a ð verkirnir myndu versna.
Viti menn... hún ákvað að hætta við eða kannski eru þetta móðurafagenin strax að koma í ljós með sinni miklu stríðni.
Þetta virðist allaveganna vera þrjósk steingeit sem býr i maganum á mér því nú eru samdrættir og verkir búnir að minnka og ekkert sem bendir til þess að fæðing sé í nánd.... svo er aldrei að vita nema þetta taki sig upp aftur á örskammri stundu en læknarnir segja að þetta sé mjög algengt með fyrsta barn.

Nú er því ekkert annað að gera en að bíða og halda sér uppteknum og annars hugar....til að koma í veg fyrir að tíminn líði hægt! Viktor vill að ég fari að hlaupa upp og niður stigana frammi á gangi til að koma öllu af stað... veit ekki hvort ég hlýði....

Flytjum fréttir þegar þær koma

yfir og út frá Litla Straumi

Gleðileg jólin

2007-12-25T21:19:00.000+01:00

Gleðileg jól kæra fjölskylda og vinir nær og fjær!!
Við áttum alveg svakalega notalegt og þægilegt aðfangadagskvöld hér í Lilleström i gær. Halla Guðrún eldaði alveg dýrindis hamborgarhrygg og himneska aspassúpu og að venju stóðu allir á gati að máltíð lokinni.
Við fengum bæði (eða réttara sagt öll þrjú) fullt af fallegu í jólagjöf og sendum við þúsund þakkir yfir hafið. Svona er ég orðin stór og útstæð... en reyndi þó að punta mig eftir bestu getu. Fæ sjálf sjokk að sjá myndir af mér en nú eru við komnar rúmar 37 vikur!

Eftir hefðbundið kvöld af pakkaupptöku og jólakortalesningum töluðum við í gegnum netið við nánustu fjölskyldu. Sonju, Grétar, Vilhelm og Íris en á þeim bænum var svo mikið jólastuð að jólatréð datt yfir stofugólfið.
Svo var talað við mömmu, pabba, Védísi og Steinunni en þar á bæ voru allir að gera sig undirbúna fyrir miðnætursmessu í Dómkirkjunni þar sem Védís og Hamrahlíðakórinn sáu um jólatónana.
Pabbi sýndi okkur meðal annars sjálfsmyndirnar sem hann sendi til fjölskyldu og vina áritaðar með gullpenna eins og alvöru Hollywoodstjörnu sæmir. Hér gefur að líta eina svoleiðis... já faðir minn er mikill húmoristi eða alveg svakalega mikill egóisti....

Innilegar jólakveðjur frá okkur hér í Noregi og við hlökkum til að taka þátt í íslenskum jólum að ári liðnu með ykkur!!!

Ha de

Góðan Þorlák !

2007-12-23T22:47:00.000+01:00

Nú eru jólin komin hér hjá okkur í Litla straumi! Halla Guðrún og Gísli Arnar eru komin og við komin í jólaskap. Hangikjötslyktin ilmar nú um alla íbúð og við vorum að ljúka við að koma jólatrénu upp og skreyta. Fyrsta jólatréð.... tímamót ekki satt..?! Grenitré ilma alveg unaðslega ... fyndið hvað maður gleymir því milli jóla.

Í gær var haldið í hinn svolkallaða "harrytur" til Svíþjóðar. Það er að segja þá fórum í bíltúr yfir landamærin til Svinasund til að fylla ísskáp og frysti af ódýrri matvöru eins og alvöru norrmönnum sæmir. Svíarnir fara hins vegar til Danmerkur í sömu tilboðstúra en Danirnir til Þýskalands, góð hringrás! Þetta er cirka 1 og hálfstíma keyrsla frá Lilleström og borgar sig margfalt í verði. Já, ég er í alvörunni orðin húsmóðir og byrjuð að bera saman mataverð...
Það fylgdi því mikil nostalgíutilfinning að komast í sænska matvörubúð og sjá matvöru og hluti sem einu sinni voru partur af hverdagsleikanum í Uppsölum fornum daga. "Bærinn" Svínasund er hins vegar upplifun út af fyrir sig.... get eiginlega ekki lýst því öðruvísi en okkur leið eins og við værum komin inn í suðurríkin i BNA þar sem hjólhýsamenningin og blikkandi ljósaskilti eru allsráðandi.

Annars líður okkur bara mjög vel. Bumban mín er búin að síga mjög á síðustu tveimur dögum og litlan farin að halda fyrir mér vöku með brölti og smá leikfimisæfingum. Enda er alveg nauðsynlegt að æfa sig vel áður en maður tekur fyrstu andatökin í þessum heimi. Allt er tilbúið fyrir komu hennar og nú er bara verið að taka því rólega og láta Höllu og Gísla Arnar dekra við okkur. Yndislegt!

Nú sitjum við í stofunni, njótum rólgheitanna og lokaútkomu jólatrésins.... fallegt ekki satt? Takið eftir frostslegnum trjánum í bakgrunninum sem setja punktinn yfir i-ið þessi jól 2007.

Rólegheitakveðjur yfir hafið frá okkur fimm í Litla straumi

Prófin búin og jólin velkomin!

2007-12-16T19:15:00.000+01:00

Úti er 10 stiga frost og hrím yfir öllu. Kertaljós fara af stað hér við fyrsta hanagal til að hita upp íbúðina og ekki slökknar á arninum á Alexander Kiellandsgötu. Það er óneitanlega jólalegt að kíkja út um stofugluggann með kakó við höndina þótt að heimþráin sé farin að segja til sín. Sem betur fer styttist í að Halla Guðrún og Gísli Arnar láti sjá sig og hlökkum við mikið til að fá smá smakk af Íslandi til að hrinda jólunum af stað. Það verður yndislegt að fá þau til okkar,
I dag eru þrjú ljós farin af stað á aðventukransinum og húsfreyjan henti í múffins í tilefni dagsins. Annaðhvart er móðureðlið að magnast með hverjum deginum eða það að mér leiðist gríðarlega mikið.
Nú erum prófin búin hjá okkur báðum sem er mikill léttir enda tekur á taugarnar að sitja við og lesa allan sólahringin. Nú tekur þvi bara við biðin mikla eftir frumburðinum sem má alveg fara að láta sjá núna. Í tilefni prólokanna var farið í Ikea og fjárfest i kommóðu/skiptiborði fyrir álfinn litla. Það voru því miklar aðgerðir hér á bæ við að breyta gestaherberginu og Viktor stóð sig eins og hetja með skrúfjárnið og leiðbeiningabæklinginn á lofti. Ikeaferðir eru komnar í stað barrölts i tilefni prófloka. Breyttir tímar. Hér gefur á að líta afraksturinn.
Norrmenn eru ekki jafn æstir og íslendingar i jólahaldi og jólakaupmennsku. Hér eru engar ofskreytingar á húsum, bara aðventuljós í gluggum og stökum sinnum jólastjarna til að lýsa upp skammdegið. Engar marglitar blikkandi perur og plastjólasveinar upp um alla veggi eins og er farið að tíðkast á Íslandi. Með öðrum orðum Jólakleppur svo ég vitni nú í föður minn. Við erum þó komin með eina seríu i stofugluggann, ég meina við erum nú einu sinni íslendingar.

Læt fylgja með sónarmyndir af álfinum sem komnar eru í ramma og upp á vegg eins og frumburði sæmir.

Jólakveðjur og saknaðarkveðjur yfir hafið

Skemmtileg helgi á undan prófatörninni

2007-11-29T22:44:00.000+01:00

Takk fyrir komuna Steinunn okkar! Það var æðislegt að fá þig og hlæja sig máttlausa við arineldinn, fara i spa og versla smá!
Grænalukka og Lúðastraumur eru nú staðsettir á topplista fröken Bergs enda vorum við hjúin dugleg að flagga því fegursta sem Noregur hefur upp á að bjóða...!

Nú eru ekki fleiri heimsóknir skipulagðar fram að jólum sem við munum ,eins og flestir vita, eyða hér í rólegheitunum í Norge. Viktor liggur þessa stundina í flensu og volæði sem búin er að herja á allt liðið eins og það leggur sig. Hann gat því ekki annað en lagst líka liðfélögum sínum til samlætis.
Ég er að fara í lokapróf í heimspeki/siðfræði á mánudaginn þannig að ég sit og tygg ofaní sjálfan mig kenningar og hugmyndir á norsku. Platón, Aristóteles, Beauvoir, Foot og Singer er það eina sem ég hugsa um... Veit ekki hvor hefur það verr....

Litli kúlubúinn er búinn að fara vel um sig og við fengum þau skilaboð í dag að hún er búin að skorða sig s.s hausinn er kominn niður.... hún er að verða reiðubúin þessi elska en spurningin er hvort verðandi foreldrar séu tilbúnir ...
Get ekki neitað því að tilhugsunin um sjálfa fæðinguna hrellir mig og hef ég því haft þá reglu á að hugsa barasta ekkert um það. Nú er hún samt orðin svo fyrirferðamikil í maganum á mér að ég er farinn að vilja fræðast um hvernig í ósköpunum ég á að fara að því að koma henni út.... úff ...

Jæja ekki meira í bili
Veikinda-og heimspekikveðjur yfir hafið

Húsbóndinn kominn heim....

2007-11-23T20:25:00.000+01:00

... og Steinunn vinkona á leiðinni! Já nú er lífið ljúft í Lúðaström.... og mjög fínt að fá Viktor heim, þreyttan en ánægðan eftir skemmtilega Íslandsdvöl!

Ég er komin 34 vikur á leið og því ótrúlega stutt eftir. Stundum finnst mér eins og fröken fix sé að reyna að brjótast út úr maganum á mér. Getum horft á magann á mér ganga í bylgjur, alveg ótrúlegt!!
Það er greinilegt að móðureðlið er farið að segja til sín því ég ákvað að baka kanelsnúða í dag ,i tilefni af komu Steinunnar, og er það í fyrsta sinn í 10 ár sem ég nota kökukefli. Ýtti því til hliðar fyrir annað mikilvægara á sínum tíma.
Gerði óvart uppskrift fyrir 100 manns og munum við því lifa á kanelsnúðum fram til jóla. Hér er afraksturinn... og já útlitið segir ekki allt....
Erum nú á leiðinni út á flugvöll að sækja frú Steinunni og ætlum að reyna að sýna henni allar bestu hliðar Noregs um helgina, svo hún muni bera hróður Lúðaström til íslands og einnig svo hún fáist til að koma aftur!!
Birti eina bumbumynd enn fyrir "bestemor" á Íslandi og hinn flugglaða aðdáanda í Flórída... og jú ykkur öll hin líka!!

Já, álfurinn stækkandi fer....

ha de bra kæra fólk
yfir og út

"Ég bið að heilsa"

2007-11-16T12:13:00.000+01:00

Nú andar suðrið sæla vindum þýðum,
á sjónum allar bárur smáar rísa
og flykkjast heim að fögru landi Ísa,
að fósturjarðar minnar strönd og hlíðum.

Ó! heilsið öllum heima rómi blíðum
um hæð og sund í drottins ást og friði;
kyssi þið, bárur! bát á fiskimiði,
blási þið, vindar! hlýtt á kinnum fríðum.

Vorboðinn ljúfi! fuglinn trúr sem fer
með fjaðrabliki háa vegaleysu
í sumardal að kveða kvæðin þín!

Heilsaðu einkum ef að fyrir ber
engil með húfu og rauðan skúf, í peysu;
þröstur minn góður! það er stúlkan mín.

Í dag er dagur íslenskrar tungu! Eins og flestir vita er hann haldinn hátíðlegur á sjálfum fæðingardegi skáldsins Jónasar Hallgrímssonar. Þar sem ég sit nú hér alein í kuldanum í Lúðaström fannst mér við hæfi að birta ofangreint ljóð, því jú jú ég bið auðvitað að heilsa heim í heiðardalinn!!

Viktor er farinn frá mér (eða á ég kannski að dramatísera þetta og segja "okkur") yfir helgina í gleðina á Íslandi. Ég er hins vegar föst hér en ætla ekki að leggjast í neina sjálfsvorkunn af þessum sökum, ónei.... ég er búin að fullbóka læruplan helgarinnar en ritgerðarskrif eru þar efst á baugi. Ég er að skrifa lokaritgerð í seinni kynjafræðikúrsinum á þessari önn og mun hún fjalla hvort nútímasamfélagið hafi jákvæð eða neikvæð áhrif á stöðu kynjanna í dag. Spennandi ég veit....
En fyrir þá sem ekki vita þá er ég búin að ná fyrsta kúrsinum í minni stuttu háskólasögu og á því bara tvo eftir á þessari önn, Heimspeki og Kynjafræði frh.

Já, jávæðnin bara skín af mér þessa dagana þrátt fyrir einveruna og svo ekki sé minnst á kuldann mikla sem er farin að herja á Lúðaström af miklu afli. Ég lauk byrjendakúrs í arineldakveikingjum hjá Viktori áður en hann fór og á því að getað kveikt á þessari frumstæðu kyndingu eins míns liðs yfir helgina (mikil kynjaskipting hefur verið í þessum hluta húsverkana undanfarið). Það er orðið svo kalt að kerti og arinn fara af stað um miðjan dag og er síðan haldið gangandi allt kvöldið.

Krakkarnir í skólanum ráku upp stór augu þegar ég fór að kvarta yfir kuldanum hér og enda héldu þau að ég væri sönn víkingamær frá landi elds og íss og því allvön nokkrum frostgráðum. Ég varð því að skýra út fyrir þeim að á Íslandi er alltaf óveður, rok, rigning og slabb á veturna en hér er bara ,ógeðslega inn á beinum, nístingskalt alla daga en samt stillt. Svona ekta skíðaveður eins og maður man eftir síðan í gamla daga á Íslandi. Held að ég hafi ekki selt skólafélögum mínum neinar íslandsferðir með þessari ræðu minni varðandi íslenskt veðurfar.

Jæja ekki meira frá einbúanum í Noregi í bili...

Ha de

Erum að verða barnvænni....

2007-11-08T18:33:00.000+01:00

...með hverjum deginum. Við fengum Hildi Þurý Indriðadóttir til að prufukeyra íbúðina okkar. Eins og neðangreind mynd sýnir þurfum við að endurskoða ýmislegt. Hún kvartaði samt ekki og undi sér hið besta við að skoða dvd-safn heimilisins bak og fyrir.

Þökkum við Hildi Þurý kærlega fyrir vel unnin störf.

Þessa stundina sit ég inní stofu með fæturna upp í loft á meðan Viktor er að galdra eitthvað unaðslegt fram í eldhúsinu af lyktinni að dæma. Þetta kæru vinir eru kostirnir við að vera óléttur, smá auka dekur í hverdagsleikanum. Úti er grenjandi rigning og arininn kominn á fullt hér í stofunni. Jólalög eru byrjuð að hljóma í búðunum hér og er jólaskapið farið að láta á sér kræla hjá okkur báðum. Þó þarf fyrst að klára prófin og skila einni ritgerð enn. Viktor fær að taka sín próf hér í Noregi og erum við svo heppin að vera bæði búin á sama degi, 13.des.
Læt fylgja með eina bumbumynd vegna mikilla áskorinna, 30 vikur kæru vinir og fer stækkandi..... Þarna inni lætur litla snúllan fara vel um sig, ótrúlegt!!

Takk fyrir hlýjar kveðjur, skemmtileg skilaboð halda manni gangandi i vetrarmyrkrinu!
Maturinn a la´Viktor tilbúinn... eigiði gott kvöld allir saman!

Næst siðasti manuður arsins.... og endalok timabilsins

2007-11-04T19:13:00.000+01:00

Fyrir nákvæmlega ári síðan steig ég fyrst á land hér í Lilleström grunlaus um hvað komandi ári mundi bera í skauti sér.
Nú er fyrsta (fótbolta) tímabil Viktors í Noregi lokið og er óhætt að segja að maður er fegin að þessu óheilla boltaári sé lokið. (vonandi...)
Meiðsli Viktors hafa einkennt dvöl okkar hér en sem betur fer hefur hann ekki misst móðinn í mótlætinu. Það sem drepur mann ekki styrkir og þolinmæði þrautir vinnur allar eru mottó ársins hjá okkur hjúum! Þó er úrslitaleikur bikarsins eftir næstu helgi en ekki líklegt að FÞ muni nota Viktor í þeim leik þannig að einbeitingunni er beint að næsta ári og tímabili.

Með barn í vændum og fámennt en góðmennt norskt jólahald framundan er notalegt að komin sér nóvember. Norski kuldinn er farin að nísta mann inn að beinum og arinnlykt liggur í loftinu í Lúðaström enda allir íbúar bæjarins með komnir með kyndinguna í botn á þessum árstíma að meðtöldum undirrituðum. Mjög sjarmerandi og róandi að hlusta á snarkið í eldinum á kvöldin, sem fara mest í lærdóm þessa dagana vegna þess að prófin nálgast óðfluga.

Binni og Halla Guðrún eru búin að vera hér síðan á fimmtudag og komu klyfjuð af góssi frá farsælda fróni fyrir okkur. Það er búið að vera yndislegt að hafa þau. Í dag skoðuðum við byggðarsafnið á Bygdö og loppemarkaðinn á Grunerlokka. Ekta þægilegur og menningarlegur sunnudagur.
Nú eru 30 vikur liðnar af meðgöngunni og er óhætt að segja að róðurinn sé farinn að þyngjast. Spennan eykst eftir komu frumburðarins. Litli álfurinn viðist vera ánægður með dvölina í bumbunni og lætur finna fyrir sér helst á morgana og kvöldin.

knús frá okkur í Lilleström

Til hamingju

2007-10-31T17:51:00.000+01:00

... með afmælið pabbi! 40 og hmmhmm í dag.... ekkert svo hár aldur fyrir verðandi afa... ekki allir afar verða að vera gráhærðir með staf...allaveganna ekki þú!

Láttu konunar á heimilinu stjana við þig í tilefni dagsins

Kveðja frá okkur hér í Lúðaström

Lif og fjör við Litla straum

2007-10-23T20:07:00.000+02:00

Þótt að loftslagið hér i Lilleström hefur kólnað til muna upp á síðkastið þá hafa síðustu vikur yljað okkur lopaokkunum um hjartarætur. Vinir og vandamenn hafa nefninlega ekki getað fengið nóg af Lilleström (eða eru það íbúarnir sem heilla...?) og gestaherbergið verið fullbókað.

Fyrst stigu á land 3 yndisfagrir sveinar, tveir frá okkar ástkæra fróni og einn frá borg er kennd er við Gauta. Þrátt fyrir ólíkar ferðavegalengdir hjá þeim var sá síðarnefndi helmingi lengur á leiðinni þökk sé skandinavísku lestarkerfi.

Piltarnir fengu auðvitað að bera þjóðarstolt norrmanna augum, sjálfan Holmenkollen, Kalli Jói var genginn þvert og endilangt, Ákabryggja skoðuð ásamt því að póker var spilaður langt fram á nótt á Alexander Kiellandsgötunni. Næturlíf Oslóarborgar (og Lúðaström) var einnig skoðað og Sigmundur sýndi snilli sína á gítarinn okkur til mikillar ánægju.

Ekki amalegt selskap þetta .... myndarlegir! Óviðjafnanlegir herramenn hér á ferð... Takk fyrir komuna kæru piltar og komiði fljótt aftur! Ástina er að finna í Lúðaström....!

Móðir mín og faðir komu síðan í frábæra helgarferð til okkar!!

Faðir minn var með mikið prógramm enda um 20 ár síðan hann var síðast í skíðaferð hér í Noregi. Náðum við þó að uppfylla allar hans óskir og höfðum gaman af.
Við fórum meðal annars í hinn fagra Vigelandgarð þar sem þessi fína mynd var tekinn af þessari óléttu við nákvæma eftirmynd af fullvaxta fóstri..... 2 mánuðir to go....!!

Það var mjög skrýtið (sorglegt) að kveðja hjónakornin vitandi það að ég mun ekki sjá þau aftur fyrr en sú stutta ákveður að koma í heiminn, nánar tiltekið árið 2008.... það var því stutt í tárin hjá þessari óléttu við kveðjustundina á Gardemoen.

Takk fyrir komuna mamma og pabbi... það var algjör vítamínsprauta að fá ykkur!!!
Og pabbi... við bíðum spennt eftir að þú tilkynnir stofnun aðdáendaklúbbs Lúðastraums á Íslandi enda vitum við að bærinn setti sitt mark á sál þína!

Knús yfir hafið frá okkur og litlu fröken fix sem virðist vera með sparkhæfileika föður síns í blóðinu... hmm hmm!

Snikudyr herja a Osloarbua

2007-10-17T18:23:00.000+02:00

Það er gripið um sig mikið varúðarástand hér á Oslóarsvæðinu.
Sníkjudýr fundust i vatnsbólinu sem sér íbúum höfuðborgarsvæðiðsins fyrir vatnsforða og því er búið að setja borgarbúa í allsherjarvatnsbann. Hélt að svona gæti nú ekki komið fyrir á vestlægum slóðum. Súreallískt og tökum við íslendingar okkar unaðslega tæra íslenska vatn sem alltof sjálfsögðum hlut.
Viktor fékk sem betur fer að heyra þetta á æfingu snemma í morgun og þegar ég mætti í skólann voru stórir rauðir varúðarmiðar út um allt. Einnig hefur heilbrigðiseftirlitið hér send út fjöldapósta á vefföng fyrirtæka og skóla með varúðarráðstöfunum.
Ekki er leyfilegt að drekka vatnið, bursta tennurnar (sem við þó gerðum bæði grunlaus í morgunsárið) eða nota vatn til matlagningar nema vatnið hafa verið soðið i minimum 3.mín.

Fólk er strax byrjað að hamstra vatn í búðum og þegar við skötuhjúin fórum að versla áðan var allt vatn horfið úr hyllunum nema við náðum að grípa síðustu tvær hálfslítra flöskurnar.
Ekki er vitað hvað bannið mun standa lengi yfir annars en fyrir minn smekk þá setur þetta stóran svartan blett á norska vatnið. Ekkert sérlega traustvekjandi. Ég mun því líklega standa og sjóða vatn á flöskur um helgina ... gaman...

Ætlaði bara rétt að kasta kveðju og láta vita að við erum öll (3) sníkudýralaus og pössum okkur vel á vatninu.
Annars er bara mikið skilastress í skólanum hjá mér, 3 ritgerðir fyrir klukkan 14.00 á föstudaginn. Því er unnið fram á nótt þessa dagana og bloggið verið í undanhaldi.

Ha de frá vatnsleysingjunum i Lúðaström

Höfðinginn sa....

2007-10-06T23:04:00.000+02:00

Afi KjÓl heiðraði okkur með nærveru sinni síðastliðna viku. Vafalaust með þægilegri gestum sem við höfum fengið, enda afi með prógramm fyrir alla daganna. Hann náði að gera og sjá það helsta sem Oslóarborg hefur upp á að bjóða og allt gerði hann fótgangangandi með kortið að vopni. Megi aðrir ferðalangar taka hann til fyrirmyndar.
Afi fyllti okkur af ýmsum fróðleik um allt milli heima og geima á meðan dvöl hans stóð.
Í gærkvöldi fylgdu við svo honum að hafnarbakkanum þar sem kappinn silgdi með ferju Color Line út Oslóarfjörðinn í kvöldsólinni. Skagen og Kaupmannahöfn eru næstu áfangastaðir afa í þessu mikla ferðalagi.

Afi Kjartan... takk fyrir komuna og vertu velkominn aftur hvenær sem er!!

Tap.. risa tap

2007-09-30T23:11:00.000+02:00

Lsk 1 - 5 Brann

Gulu fuglarnir steinlágu fyrir íslendinga- og topp liðinu frá Bergen.

"xxxxx xxxxxxxx" eins og þjálfaraefni hinna gulu er kallaður hér á Alexander K. götunni ákvað að Viktor væri best geymdur á bekknum við lítinn fögnuð okkar!

Þetta var þó hressandi leikur með nær fullum leikvangi af áhorfendum og fullt af flottum mörkum.

Hefði bara vilja sjá okkar mann inná bjargandi málunum því þar á hann heima.....

Næturlif Osloar kannað og heimsoknarhryna i Luðaström

2007-09-30T16:45:00.001+02:00

Loksins var látið verða af því að við íslensku (+ ein norsk) stúlkurnar í Oslóarsvæðinu hittumst. Farið var á einn vinsælasta tapasbar borgarinnar og svo tók við örlítill könnunarleiðangur um bestu barina.
Rosalega var gott að fara aðeins í djammgírinn og fékk ég mikla athygli út á kúluna (sem stækkandi fer). Fataskápurinn hefur skroppið saman síðustu daga en á móti kom að ég hef sjaldan verið jafn afslöppuð að gera mig til. Enda skipti öllu að litli álfurinn mundi láta sér líða vel. Ákveðið var að gera ofangreindan viðburð að mánaðarlegum hitting og mun ég reyna að láta sjá mig á meðan ég er ekki offyrirferðamikill.

Mikil heimsóknarhryna hefur nú skollið á Lúðaström, Halli og Berglind eru búin að vera hjá okkur síðan fyrir helgi en munu kveðja Noreg á morgun. Þá mun afi KJÓL heiðra okkur með nærveru sinni en heldur svo áleiðis til Skagen og Kaupmannahafnar. Því næst munu KR félagarnir Simmi og Bjöggi fagna sæti síns liðs í Landbankadeildinni með leiðangri til Norges við mikinn fögnuð okkar hér. Um leið og þeir kveðja koma síðan mínir ástkæru foreldrar og munu dvelja hjá okkur yfir langa helgi....

Já það mun vera fjör hér á Alexanders Kiellandsgötu næstu vikurnar sem við tökum fagnandi og mega fleiri taka sér ofangreinda einstaklinga til fyrirmyndar!!

Í kvöld munum við halda á einn aðalfótboltaleik tímabilins því LSK tekur á móti toppliði deildarinnar Brann klukkan 20.00. Uppselt er á leikinn fyrir löngu síðan og býst ég við mikillri stemmingu. Viktor mun verma bekkinn og allaveganna mun hann reyna að gera það eftir bestu getu, hvort tækifærið gefist i kveld en svo allt önnur saga.

Kveð með einni góðri af mér og Jóhönnu síðan á föstudagskvöldið

Ha de

Takk fyrir innlitið

2007-09-21T22:41:00.000+02:00

Signý og Palli komu okkur að óvörum til Noregs fyrir stuttu síðan. Skötuhjúin voru í helgarferð til Lopasokkalandsins í fyrsta sinn og lagðist hin dimma Oslóarborg vel í hjúin.
Við og Halla Guðrún náðum að hitta þau í kaffi ásamt smá spássitúr áður en þau héldu á vit næturlífs Oslóar í boði vinnu Signýjar.
Signý mundi eftir að setja að setja filmu í myndavélina og var svo góð að senda okkur sýnishorn af útkomunni sem birtist hér til að setja smá lit á síðuna.

Takk fyrir okkur!

Cogito, ergo sum

2007-09-13T10:10:00.000+02:00

Það passar ekkert betur en sitja i stærsta bíósal Oslóarborgar sem gengur undir nafninu Colosseum og hlusta á áhugaverðan fyrirlestur um heimspekinginn Descartes. Hann er sá fyrsti sem hefur vakið áhuga minn og í fyrsta sinn í langan tíma sem ég les kafla í heimspekibókinni minni án þess að geispa. Mér fannst líka ótrúleg grátbroslegt þegar kennarinn var alltaf að tala um að Descartes "frös ihjäl i Stockholm"...greyið!
Ofangreindur kuldaboli er farin að láta á sér kræla hér í Norge eftir frekar heita helgi. Halla Guðrún heiðraði okkur með nærveru sinni sem var mjög notalegt enda lítið sem maður þarf að gera á heimilinu þegar Halla Guðrún er nálægt. Hún gaf meðal annars svölunum okkar þessa fínu andlitslyftingu enda voru brúnu uppþornuðu blóminn á svölunum okkar blokkinni til skammar. Áttræða konan sem býr við hliðná okkur brosti til okkar í fyrsta sinn þegar við vorum að planta blómum, ein ánægð að við ákváðum loksin að skipta. TAKK FYRIR KOMUNA HALLA.

Annars eru bara þrjár ritgerðir sem ég þarf að skila í þessum mánuði þannig að ég sit sem fastast við tölvuna þessa dagana. Viktor æfir og æfir og er búinn að vera að fá stjörnur í dagblöðunum hér fyrir frammistöðu sína í varaliðsleikjunum. Þetta virðist því allt vera á réttri leið en hann segist vera orðinn um 90% góður í ökklanum. Þá er bara að bíða eftir að hann hljóti náð þjálfarnas í komandi leikjum en Lilleström er í mikilli toppbaráttu við Brann á lokaspretti deildarinnar. Því er aldrei að vita hvenær eða hvort tækifærið muni gefast á þessu ári.
Litli sprelligosinn er að hafa það mjög gott og er búin að velja kennslutíma mína sem tíma leikfimisæfinga og heljarstökka. Get ekki varist brosi þegar allt fer á fullt i annars alvarlegu umhverfi. Þetta verður raunverulegra með hverjum deginum og erum við nú byrjuð að huga að barnadótakaupum enda ekki lítið sem þessi litli álfur þarf á að halda.

Jæja ætla ekki að hafa þetta lengra í bili.

Ha de

Filosofisk filosofia

2007-09-03T17:03:00.000+02:00

Þegar ég lagði fyrst heim heimspekinnar fyrir mér var ég ekki skriðin yfir tvítugt og staðsett í hinu verndaða umhverfi menntastofnunarinnar við Sundin. Kennarinn minn hét grísku nafni og lagði sig allan fram við að sýna mér að þetta fag hentaði ekki rökhugsuðinum mér. Ég einsetti mér að eftir að hafa náð blessaða stúdentsprófinu mundi heimspekibækurnar fara uppá hyllu til þess eins að safna ryki. Ég, Platón, Aristóteles og Descartes eigum nákvæmlega núll sameiginlegt.
Ekki datt mér þá í hug næst mundi ég sitja í 1000 manna fyrirlestra sal með 999 ókunnugum hlustandi að tveggja tíma fyrirlestra um ofangreinda óvini mína á NORSKU. Já, núna get ég sagt að ég hefði átt að hlusta betur á grískættaða kennarann í den. Hann talaði allaveganna mitt eigið tungumál.
Sænska og Norska eru mjög svipuð í rituðu máli en talmálið getur verið flókið enda mállýskurnar hér óteljandi. Stundum held ég í alvörunni að fólk sé ekki að tala norsku heldur bara að syngja eitthvað lag. Ég hef sjaldan einbeitt mér jafn mikið í kennslustundum. Vonandi skilar það sér í lok annar.

Dagurinn í gær var leiðinlegur, Viktor var í Stavanger, leikurinn fór 1-1, Viktor fékk ekki að koma inná, ég keyrði fram á tvær rottur á stærð við ketti á leiðinni heim frá Osló í gærkvöldi, ein var dauð og hin var sprelllifandi. Var með ógeðishroll niðrá bak restina af leiðinni.

Eina góða við daginn í gær var að elsku besti Afi minn fyllti 75 ár í gær!! Til hamingju með daginn elsku (lang) Afi ***

ha de

Litið stelpuskott mun það verða... (örugglega)

2007-09-02T09:43:00.000+02:00

..og ég er búin að halda það allan tímann. Ljósmóðirin sagði að í flestum tilvikum hefði mamman rétt fyrir sér, greinilegt að það byrjar strax enda löngu vitað að mamma veit alltaf best.
Þetta er samt aldrei 100% öruggt og margir búnir að deila með okkur sögur af fólki sem fékk að vita vitlaust í sónarnum.

Við fengum að sjá spítalann í fyrsta skiptið á þriðjudaginn... hann er STÓR og yfirþyrmandi. Gott að fá smá tíma til að melta hann og venjast tilhugsuninni um að þurfa að dvelja þar. Ljósmóðirin var norskumælandi finni og Viktor bað um þýðingu fyrir öllu sem hún sagði. Mjög fyndin tungumála blanda.
Litli álfurinn var ekkert par hrifin af afskiptaseminni og lét sko aldeilis finna fyrir sér á meðan skoðuninni stóð. Í hvert skipti sem ljósan ýtti sparkaði hún á móti. Karaktereinkennin komin strax og frábært að fylgjast með. Ljósmóðirinn sagðist sjaldan hafa séð jafn aktívt barn eftir bara 20 vikur.

Annars er lífið bara búið að vera ljúft síðustu daga. Viktor er komin í flott form og gengur bara vel á æfingum.
Í morgun lagði hann af stað til Stavangurs og mun vera þar fram á Mánudag. Uwe Rösler, þjálfarinn sem keypti Viktor til Lsk er að þjálfa Víking Stavanger núna og Tom Nordlie núverandi þjálfari Lsk var að þjálfa Víking síðasta sumar. Viðureign kvöldsins er því ekki endast barátta um annað sætið heldur líka ákveðin sýniþörf þjálfara.

Ég mun leita skjóls hjá Indriða, Jóhönnu og Hildi litlu í kvöld enda ekki par gaman að vera aleinn í Lúðaström. Þar ætla ég að horfa á leikinn sem byrjar 20.00 og vona það besta. Tækifærið hlýtur að vera á leiðinni.

Góða helgi allir saman

19 vikur og 5 dagar

2007-08-28T21:31:00.001+02:00

Áætlaður fæðingardagur 18.01.08

og kynið komið í ljós.........

Getiði nú.....?!

"Draumur hvers þjalfara"

2007-08-26T12:03:00.000+02:00

Í kvöld er heimaleikur LSK við lið Álasunds. Liðið er neðarlega í deildinni á meðan gulklæddu fuglarnir frá Lúðaström eru sem stendur í öðru sæti. Leikskrá dagsins inniheldur þetta fína heilsíðu viðtal við draumabarnið frá "Sagoöja" eins og þið sjáið.
Þar er stiklað á stóru í ferli Viktors og vitnað í orð Magnúsar Gylfasonsr þjálfara Víkings um að Viktor sé draumur hvers þjálfara, frekar skondin fyrirsögn.

Einnig er ein millifyrirsögnin "Ska bli far" þar sem hann segist bíða með öndina í hálsinum eftir janúarmánuði og fæðingunni miklu... blaðamenn eiga það til að ýkja aðeins en samt sem áður gaman að lesa það!

Í dag er sól og blíða og er ég þvi að spá í að heiðra leikvanginn með nærveru minni í þeirri von um að Viktor fái að koma inn á.
Á morgun mun hann allaveganna spila í varaliðsleik sem er klukkatíma flug í burtu. Loksins fær hann að sjá meir af Noregi en bara höfuðborgarsvæðið.

Ætla nú að fara að snúa mér aftur að lestri .... langaði bara að deila þessu viðtali með ykkur!

Ha de

Hitabylgja undir lokin

2007-08-24T10:04:00.000+02:00

Þessa dagana er búið að vera hreint ótrúlega gott veður... 30 stiga hiti og heiðskírt. Norska sumarið ætlar greinilega að kveðja með stæl.
Seinni æfingar dagsins hjá Viktori eru því frekar strembnar og einkennast mest af vatndrykkju (held ég). Hann er orðin frekar dökkur á hörund og það fyrsta sem hann gerir þegar hann kemur heim er að metast við mig um hvor er brúnni. Ég er þekkt fyrir maraþonsólbaðsiðkun og læt því ekki mitt eftir liggja. Saga femínismans í bland við Annað kyn eftir hina þekktu Simone Beauvoir hefur því verið lesið útí garði með olíjuna mér við hlið.... já það er gott að vera í skóla!!
Ekki þar með sagt að námið sé leikur einn enda strax búið að demba á manni ritgerðarskilum og munnlegum ræðuhöldum... kvíði nett fyrir síðari hlutnum en ég er bara að reyna að tala við Norrmenn eins mikið og ég get til að æfa mig.

Annars eru nú meðgangan mikla hálfnuð (19 vikur) og við fórum til læknisins í gær. Allt leit afbragðs vel og hjartslátturinn hjá álfinum litla kraftmikill (eins og læknirinn sagði sem talar alltaf barnið sem karlkyns tilvonandi fótboltastjörnu).
Kúlan er í minnsta lagi á "meðalkúrfunni" enda ekki við öðru að búast þegar foreldranir eru svona smávaxin.
Svo er bara bíðum við spennt eftir næstkomandi þriðjudegi.

Erum að fara að taka okkur á í myndatökumálum enda frekar slöpp í því undanfarið...

kveðjur yfir höfin

Ha de bra

Biðin mikla ekki a enda enn

2007-08-17T22:32:00.000+02:00

Kæra fólk!

Mér þykir miður að þurfa að færa ykkur engar fréttir af 5 mánaða sónarnum í dag... tímanum okkar var nefninlega FRESTAÐ. Ástæðan fyrir þessum tilfæringum eru hins vegar ÁNÆGJULEGAR því loksins er Viktor komin inn í liðið ( eða hóp ) fyrir bikarleik Lilleström við Oslóarliðið Fc Lyn á sunnudaginn. Eftir næstum því 5 mánaða meiðslavesen er ekki annað en hægt að gleðjast yfir þessum fréttum. Það var því ekki hægt að biðja um frí á síðustu æfingu fyrir leik fyrir sónarinn.
Við mæðginin/mæðgurnar gáfum þessu mikinn skilning. Næsti tími er 28/8 klukkan 19.30 á staðartíma... honum verður EKKI frestað!! Enda spenningur mikill hér á bæ. Þessi tími hentar okkur mjög vel þar sem litli álfurinn er ávallt hinn hressasti á kvöldin og byrjaður að minna mjög á sig. Við búumst því við mikilli fimleikasýningu í sónarnum!

Annars er þetta búin að vera mjög viðburðarrík vika fyrir okkur bæði... Viktor er búinn að vera á brjáluðum æfingum enda virðist þjálfarinn hafa gert það að forgangsverkefni að koma honum í form sem er mjög gott. Hann er því búin að vera í fullri keyrslu ásamt furðulegum sjokkmeðferðum fyrir ökklann sem þó virðast vera að skila sínu.

Ég búin að vera í skólanum á hverjum einasta degi og líst bara vel á. Í fyrstu var þetta mjög yfirþyrmandi enda Háskólinn í Osló mjög stór með yfir 60.000 nemendur. "Campus svæðið" er eins lítill sér bær inní miðri Osló með búðum, leikskólum, læknaþjónustu o.sfrv.
Ég er búin að velja með fjölmiðlafræði með kynjafræðilegu sjónarhorni eða "Medievitenskap med ett kjönnsperspektiv" þannig að ég mun á endanum útskrifast með BA próf í fjölmiðlun eins og planið var frá byrjun. Mjög spennandi og vona ég að við náum að stansa í Noregi nógu lengi til þess að ég geti klárað.
Fyrsta önnin mín verður þó endast helguð femínisma og mannfræði ásamt einu kúrs í heimspeki. Spennó!

Bumbumyndir verða að bíða fyrir spennta áhorfendur því síða fyrir slíkar myndir er í vinnslu sem stendur... ég er samt búin að stækka ört síðan klakaheimsókn átti sér stað og get ég ekki falið kúluna lengur. Já ég er "þessi ólétta" núna.

Læt eina skemmtilega mynd af þremur ofurhugum sem létu lofthræðslu ekki á sig fá og drifu sig alla leið upp í turnin á Holmenkollen skíðstökkpallinum.

Höfum það á hreinu að langamman nánast skokkaði upp rúmlega 100 tröppur á meðan sú ólétta sat niðri á bekk.

Hafið það gott eða Ha de og go´helg

Hressandi helgarheimsokn

2007-08-12T21:22:00.000+02:00

Litla fjölskyldan frá Kaupmannahöfn ákvað að heiðra okkur með nærveru sinni um helgina! Einstaklega skemmtileg og óvænt ánægja.
Frú Magnea lét ekki sitt eftir liggja og náði svo sannarlega að heilla okkur bæði upp úr skónum !!
Algjört sætabrauð þar á ferð !!!

Við náðum að sýna þeim í stuttum dráttum hvað Oslóarborg hefur upp á að bjóða sem og Litli straumur! Takk fyrir komuna elsku besta fólk... algjör vítamínsprauta í ágústmánuði!!

Viktor og Magnea eru rosa góðir vinir!

Annars blómstrum við bæði hér .... ég fram á við og Viktor í fætinum !!! Maginn á mér er á fullri ferð á kvöldin þar sem litli íþróttaálfurinn skemmtir sér við að gera heljarstökk og leikfimiæfingar... ekki beint líkur móður sinni í þeim efnunum!
Aldís varð svo þess heiðurs aðnjótandi að finna FYRSTA SPARKIÐ í gærkvöldi!! Það var alveg magnað og ótrúlega skrýtið.. Viktor bíður spenntur eftir næsta tækifæri!!

Framundan er viðburðarrík vika sem inniber skólabyrjun og sónarskoðun.. já það er hin eftirsóknarverða 5 mánaða skoðun á föstudaginn... vægast sagt spennandi vika!!

Látum vita ..... af okkur ( öllum þrem )

Ha de

Stiklað a staðreyndum

2007-07-26T19:53:00.000+02:00

Jæja... kæra fólk! Loksins fréttir af lúðunum.

Veit ekki almennilega hvers vegna þessi máltregi hefur átt sér stað undanfarnar vikur ... ekki er hægt að skella skuldinni á atburðarleysi enda mikið búið að ganga á í lopasokkalífi. Og við sem héldum að við værum bara að fara að slaka á í sveitasælunni... ekki aldeilis. Það er einfaldlega búið að vera frá of miklu að segja.

Eins og flestir vita um er fjölgun væntanleg í janúar (það er búið að segja allt frá 8-23 við okkur þannig að það er best að halda sig bara við mánuðinn). Það hefur verið erfitt að þegja yfir þessu leyndarmáli síðustu mánuði og er það eiginlega stærsta ástæða hraðminnkandi bloggfærsla undanfarið. Mikið spennufall átti sér því stað hjá okkur hjúnum þegar komið var aftur út eftir heimferðina enda einkenndist þessi stutta heimsókn af miklu stressi.
Þetta er eiginlega hálf óraunverulegt ennþá og erfitt að ímynda sér að inní mér sé að vaxa lítið barn .... hálft ég og hálft Viktor... MERKILEGT!!
Ég fer stækkandi með hverjum deginum og Viktori hafði orð á því um daginn að það væri fyndið að sjá mig með "svona maga"!! Einmitt... hann sagði fyndið! Ég hló ekki..

Það er síðan gaman að segja frá því að ég komst inn í Oslóarháskóla og mun hefja nám í Kynjafræði ekki seinna en 14. ágúst næstkomandi. Kasólétt eftir tuðrusparkara í kynjafræði.... sjáiði kaldhæðnina í því? Hlakka mikið til að setjast á skólabekk á ný og ennþá meira til að komast að því hvað kynjafræði í raun og veru snýst um!!
Viktor heldur því fram að sambúð okkar muni líða mikið fyrir þetta "feministanám" og sér fram á heila önn fulla af klósettþrifum og þvottahúsferðum ásamt daglegum fyrirlestrum um jafnrétti kynjanna og kúgun kvenna gegnum tíðina. Væli með hans orðum. Sjáum til en annars eiga óléttuhormónarnir eflaust eftir að hafa sitt segja líka.

Viktor er allur að koma til og aðgerðin virðist hafa heppnast vel... hann er byrjaður á miklu undirbúningsprógrammi og eru menn að voanst eftir því að hann nái endanum af tímabilinu sem lýkur í Nóvember.

Heimsóknir hafa verið tíðar og góðar. Halla 1 kom hingað ásamt kaupglöðu systrum mínum og undu þær sér vel í Noregi á Munchlistasafni og H&M ferðum meðal annars. Æðislegt að fá mæðgurnar mínar í heimsókn og mamma lumaði á ýmsum góðum lausnum eins og henni einni er lagið. Megi þær koma sem fyrst aftur!!

Þessa dagana eru aðrar mæðgur í heimsókn, Halla 2 og Addý bestemor fara á kostum hér í lopasokklandi. Húsráðin koma til mín á færibandi frá þeirra viskubrunnum og er ég ekki búin að stíga fæti inn í eldhúsið síðan þær komu. Ekki amalegir gestir það!!

Þannig að ég get ekki sagt að við séum búin að vera að stjana við gesti allan þennan mánuð heldur er það frekar öfugt!

Sonja og Halli, ég biðst innlegrar afsökunar á þessari bloggleti og mun framvegis vera regla á þessi. Ber hins vegar litla ábyrgð á því sem hér mun koma fram enda hef ég litla stjórn á þessu mikla hormónaflæði sem fer hækkandi með hverjum deginum.

Ha de

p.s Mallie.. viltu senda mér mail á alfrun.pals@gmail.com... hotmailið virkar ekki lengur .. hlakka til að heyra í þér!!

Mæðgum skolar a land i Litlastraumi

2007-07-10T21:54:00.000+02:00

Það bar helst til tíðinda í Litlastraumi að þremur pabbalausum mæðgum skolaði á land um hádegisbilið föstudaginn 7. júlí síðastliðinn. Þær voru orðnar langeygar eftir að heimsækja lúðana í samnefndum bæ. Svo óheppilega vildi til að heimamenn höfðu brugðið sér yfir hafið og voru rétt ókomnir. Systurnar tvær voru óvanar því að ferðast pabbalausar og alveg hissa þegar þær uppgötvuðu að þær voru allt í einu komnar heilar í höfn með lyklavöld að öllum herlegheitunum. Á ferðalögum þeirra hingað til hefur ratvísi pabba ráðið för og aldrei að vita hvort öll skilningavit á mömmu virki, hún er nefnilega bæði farin að tapa sjón og heyrn og verður að stóla á þefskynið þegar mikið liggur við. Nema hvað ... við runnum á lyktina og síðan hefur ekkert borið til tíðinda annað en það að debetkort mömmu rataði á einhvern yfirskilvitlegan hátt ofan í klinkbudduna hennar sem er stórhættulegur staður fyrir slíka gersemi og var umsvifalaust dæmt úr leik, stolið og horfið og hringt í ofboði í pabba sem hafði beðið allan daginn eftir SOS merki frá mæðgunum og fékk þarna kærkomna fullvissu um að það hefði verið óðs manns æði að hleypa þeim mæðgum einum yfir hafið. Ótti hans reyndist ástæðulaus því þegar ísþorsti mæðgnanna gerði vart við sig nokkrum klukkutímum síðar poppaði horfna debetkortið upp úr klinkbuddunni og þá mundi mamma að hún hafði panikerað við automatinn þegar hún keypti lestarmiðana til Osló enda lestin alveg að koma og debetkortinu dembt með klinkinu í budduna enda klinkið mun tryggari gjaldmiðill í sjálfsalanum þeim. Síðan þá hefur verið lygnt í Litlastraumi.
Þetta er gestapenni Lopasokka, HKjól

Uppskurði lokið og klakaför undirbuin

2007-06-30T21:55:00.000+02:00

Jæja þá er síðasta vika júnímánaðar að renna sitt skeið og er hún ekki búin að vera viburðarlítil. Ég ákvað að nýta heilann húsbónda áður en hann hélt í uppskurð og var því haldið í heljarinnar Ikeaferð með mæðgunum ( Sonju og Írisi) þar sem fest voru kaup á fallegt sófaborð og annað smálegt. Það var því heldur þungur og troðinn Polo bíll sem brunaði frá Ikea til Lúðaström með okkur fjögur og plús heilt sófaborð og annan varning. Talandi um fílahjörð í bjöllu. Útsöluþyrstir Norrmennirnir hlógu og bentu á meðan við vorum að raða vandlega í bílinn á bílaplaninu. Viktor erfir skipulagshæfileikana frá föður sínum. það er alveg greinilegt.

Á föstudaginn rann svo stóri spítaladagurinn upp og var ræs á línuna klukkan hálf 7 enda þurftum við að keyra í morguntrafíkinni til Osló. Klukkan 8 var Viktor lagður inn og kominn heim aftur um tvöleytið. Ég þurfti að opna búðina klukkan hálf tíu þannig að Sonju tók að sér ábyrgðina að keyra sjúklinginn aftur til Lúðaström, hefðum ekki getað verið án hennar!
Aðgerðin sjálf gekk eins og í sögu. "Ballerínubeinið" var á stærð við krónupening og var það brotið og laust inní ökklanum. Ekki skrýtið að Viktori er búið að vera svona illt. Læknarnir voru ánægðir með þetta og mun endurkoma Viktors í fótboltann vera fyrr en áætlað var eða eftir 4-6 vikur.
Greyið er samt sem áður með umbúðir á fæti og hækjur í hendi, getur því lítið gert annað en að liggja. Eins gott að nú eru tvær þjónustustúlkur á heimilinu til að stjana við strákinn. Hækjurnar munu þó líklega hverfa eftir viku eða svo.

Nú styttist í kærkomna heimkomu á okkar hálfu og erum að undirbúa komuna í íslensku blíðuna enda montsímtöl á heiman búin að vera þó nokkur síðustu daga!! Til hamingju með sólina Ísland. Af veður spánni að dæma munu hún samt hverfa fyrir okkur lopasokka um leið og við lendum og hið venjulega íslenska sumar taka við.... jess!!

Að lokum vil ég óska Langafa Sigurbirni innilega Til hamingju með 96 ára afmælið í dag... kærar kveðjur yfir hafið afi minn!!

Sjáumst eftir smá og þangað til....

HA DE

Urhellisrigning hja lopasokkum

2007-06-25T12:06:00.000+02:00

Nú er Sonja búin að vera hjá okkur síðan fyrir helgi, blessunin ákvað að gera ykkur klakabúum mikinn greiða og taka rigninguna með sér hingað. Skilst að heima sér búið að vera blíðskaparveður en hér er sko búið að vera skýfall alla helgina. Greyið Sonja... vonandi fer Noregur að sýna sitt rétta andlit í bráð.

Íris litla er orðin mikill skemmtikraftur og heldur uppi miklu fjöri hér á heimilinu. Talar, hjalar og leikur við hvern sinn fingur. Gaman að fá svona fjörkálf í heimsókn.

Eins og flestir vita er lokins búið að finna út hvað er að Viktori greyinu. Hann virðist vera með "ballerínubein" í ökklanum sem er brotið. Það eru ekki allir svo heppnir að vera með þetta einstaka bein þannig á föstudaginn mun Viktor fara í uppskurð g beinið fjarlægt. Gaman að segja frá því að þessi meiðsl eru algengust hjá ballerínum. Einmitt!! Endurhæfingin tekur svo 6-8 vikur en sem betur fer mun kappinn alveg geta æft og haldið sér í formi á meðan.

Nú er vika í að við komum heim og bæði farin að hlakka mikið til. Telma vinkona er svo mikill engill að hún bauð okkar fínu íbúðina sína á Laufásveginum. Yndi...!! þannig að við verðum í miðbænum á meðan við erum á Íslandinu góða.

Að lokum vil ég óska afmælisbarni dagsins innilega til hamingju með daginn!!!

Höldum upp á það alla næstu viku....kossar og knús yfir hafið!!

Ha de

Pönnsuparti.. fyrir tvo takk!!

2007-06-18T19:58:00.000+02:00

Til að sýna það og sanna að við erum orðin búrsleg ákváðum við að birta hér myndir af okkar fyrsta pönnukökubakstri!! Já þið eruð að lesa rétt.. við ákváðum að baka íslenskar pönnukökur á venjulegum mánudegi. Verkaskiptingin í eldhúsinu var líka mjög jöfn, ég hrærði deigið og Viktor sýndi snilli sína með pönnuna!! Fyrstu 10 pönnukökurnar fóru beinustu leið í ruslið þó enda pönnukökubakstur listform að mínu mati. Ömmur Íslands eiga mikla virðingu skilið fyrir að hafa gert þetta án þess að blikna frá örófi alda.
Að lokum tókst okkur þetta og þjóðhátíðardaguri Íslands var haldinn hátíðlegur (reyndar degi of seint) með fámennu en góðmennu pönnsupartí í Lúðaström. Næst þorum við líklega að bjóða fleirum...

ha de

Bursdag i dag

2007-06-15T20:38:00.000+02:00

Til hamingju með afmælið elsku besta Sonja !! Við munum skála fyrir þig í kvöld og hlökkum til að fá ykkur mæðgur til okkar eftir eina viku !!

*** knús

Einnig viljum munum við skála fyrir Kristjáni frænda Viktors sem einnig fyllir ár í dag... Til hamingju með daginn !!

Hipp hipp húrra

Drunur og þrumur

2007-06-14T11:28:00.000+02:00

Í nótt vöknuðum við upp við háværar drunur, það var eins og 10 flugvélar væru í lágflugi yfir húsinu. Eins og hendi væru veifað skall svo á þessi svakalega rigningarDempa ( með stóru D). Það var alvöru útlandabragur yfir rigningunni sem var einsog girnileg sturta á götum Lúðaström. Kærkomið regn eftir mikið og gott þurrkutímabil.

Nú er því hitabylgjunni aflétt og viftan komin inní skáp. Eigum örugglega (eða meira vonandi) eftir að þurfa að nota hana aftur seinna í sumar.

Viktor er allur að komast í lag og náði meira að segja að spila sinn fyrsta leik í 2 mánuði um daginn. Hann stóð sig mjög vel að mínu mati, átti góðar stungusendingar og nokkur skot á markið.( er að spá í að leggja íþróttablaðamennsku fyrir mig) Eitthvað vantar þó upp á að hann komist í betra form en vonandi verður það komið eftir fríið í Júlí. Það fer að koma tími á það að hann fái að setja sinn svip á norska knattspyrnu. Lilleström er sem stendur í 2 sæti deildarinnar eftir 3-1 tap gegn Brann á sunnudaginn.

Ég er loksins búin að klára alla pappírsvinnu vegna skólamála og umsóknin mín með einkunnum komin inn í kerfið. Það er búið að vera mikið stress og Norrmenn ekkert sérstaklega þjónustulundir. Fólk er hins vegar búið vera að hræða mig og segja að líkurnar á að komast inn í námið séu ekki hliðhollar mér en ég fæ ekkert að vita fyrr en 26.júlí. Þangað til er bara að vona það besta og undirbúa plan B.

Annars er hversdagsleikinn góður í Lúðaström...

Kram

Bongobliða

2007-06-10T09:22:00.000+02:00

Noregur hefur síðustu daga komið okkur mikið á óvart með svokölluðu spánarveðri... ekki poppaði 30 stiga hiti og sól upp í hugann á mér þegar við fluttum hingað í vetrarhörkunni. En þessi fyrsta vika í júní hefur slegið öll hitamet ( síðast var svona heitt árið 1880 samkvæmt VG - blaðinu) og á föstudaginn sýndi hitamælirinn í bílnum heil 35 stig í skugga!! Ég er ekki að ljúga... og eru við lopasokkarnir búin að vera dugleg að senda montskilaboð heim í rokið og rigninguna. Það er alltaf klassískt.

Viktor er ekki fíla þennan hita enda segist hann svitna í hverju einasta skrefi og fékk hann mígreni á æfingu um daginn... ekki mundi ég vilja æfa úti í þessum hita.. en enginn miskunn hjá Nordlie þjálfara sem pískar strákana áfram sama hvað!!
Við þurftum meira að segja að kaupa viftu inn á heimilið til að gera lífið í hitanum bærilegra fyrir okkur og sofum við því undir köldum blæstri sem er ómissandi. Einnig fékk ég loksins tvo alvöru sólabaðsstóla á svalirnar okkar þannig að ég geti sleikt sólina á meðan Viktor situr inní stofu við viftuna, hann er ekki sjúkur í að fara í sólbað. Þannig að sólarsjúkir eru velkomnir hingað til að nota hinn stóllinn, mér fer að vanta selskap í brúnkunni enda Viktor ekki að gefa mér mikla samkeppni!

Afmælisdagurinn minn var æðislegur, bongóblíða eins og venjan er á þessum merkisdegi. Gyða vinkona minnti mig á að gott veður á afmælisdag þýðir að maður hefur verið stilltur og góður á síðasta ári... þar hafiði það, ég var svoo stillt að veðrið ákvað að haldast í 10 daga og slá met ....!!
Viktor fórnaði sér í sólabað á ströndinni með mér og fórum síðan á indverskan stað um kvöldið.
Takk fyrir allar skemmtilegu kveðjurnar kæra fólk!

Við erum loksins búinn að panta okkur flug heim en áætluð koma er 2.júlí... þannig að verið viðbúin skyndiheimsóknum þessa stuttu viku sem við munum heiðrað klakann með nærveru okkar.

Heimsóknir til lopasokkalands eru að aukast og er gestaherbergið nánast uppbókað frá 22 júní til fyrsta ágúst gaman gaman!! Það mega fleiri fara að fordæmi Sonju systur Viktors sem pantaði sér far til okkar vikunni gagngert til að losna aðeins við íslenska rokið. Hún er væntanleg eftir 12 daga jess!!

Jæja ætla að fara að undirbúa morgunverð á svölunum enda of heitt til að borða inni...

Ha de bra

Kram

Afmælisbörn dagsins

2007-06-02T10:12:00.000+02:00

Til hamingju með daginn Afi Kjartan!!
Flottur á þessari mynd með fótboltadómararéttindin sín í hendinni... já kallinn leynir á sér!!

Hin gullfallega Magnea fyllir sitt fyrsta ár í dag!!! Til hamingju litla uppáhalds uppáhald.... ********

Hinn óborganlegi hárlæknir Jón Atli Helgasson á einnig afmæli í dag!! Til hamingju ***** vild við gæti verið með ykkur á skála í kampó í tilefni dagsins!!!

Einstaklega fríður hópur af afmælisbörnum hér á ferð

Knús

Allt er a tja og tundri

2007-05-29T22:35:00.001+02:00

Ég hef þjáðst af nettum bloggleiða undanfarna daga en mér skilst að þetta hráji flesta "bloggara" en líður skjótt hjá... innilegar afsökunarbeiðnir í þessu sinnuleysi frá lopasokkalandi!!

Hér hefur mikið gerst síðan síðast.. Halla Guðrún og Gísli Arnar eru búin að heiðra okkur með nærveru sinni þessa helgina. Það er því búið að afreka miklu m.a pallinn lakkaður og blóm kominn í potta. Hefði ekki gerst ef dugnaðarforkarnir hefði ekki litið við.. ekki skrýtið að þau eru búin að byggja hús!!
Einnig hafa þeir feðgar minnkað forgjöfina sína í heljarinnar golfferðum síðustu daga. Þau fara á í fyrramálið aftur heim með þessu nýja (og frekar sérkennilega en ódýra ) nætur/morgunflugi.

Ég er byrjuð að vinna sem er æði!!! En það er svolítið erfitt að byrja að standa svona allan daginn aftur og er ég frekar lúinn í lok dags... ( ég sem var í svo góðri þjálfun eftir 6 ár í Kringlunni)!! Þessi verslunarmiðstöð er ívið flottari enda bara 6 mánaða gömul og heitir House of Oslo. Mikið af fallegum innanhúsmunum þar!! Sakna nú samt fatalufsanna,

Viktor er byrjaður af æfa aftur með liðinu eftir sárar 7 vikur í meiðslum. Öllum til mikillar ánægju og gleði þó mest atvinnumanninum sjálfum!!! Hann var að fá þær fréttir í dag að Lilleström er með KR-ingum í riðli í Ervópukeppninni og mun hann því líklega koma til íslands í lok júlí til að keppa í Frostaskjóli. Miðað við gengi svarthvítu hetjanna undanfarið mun þessi leikur fara okkar mönnum í hag .... (þ.e.a.s Lilleström!)

Að lokum viljum við lopasokkar óska nokkrum afreksmönnum í familiunni til hamingju...

Sindra með leiklistargráðuna... jess innilega til Lukku!!

Hörpu með stúdentsprófin... þú varst víst langflottust á útskriftinni!!!

Kristjáni frænda með stúdentinn ... og gangi þér vel í Danaveldi!!

Melkorku frænku fyrir glæsilega útkomu á stúdentsprófunum!!

Ofangreindir eru allir velkomnir í útskriftarferð í norsku sumarblíðuna... ****

Ha de

Þjoðerniskennd Norrmanna 17 mai

2007-05-19T09:58:00.000+02:00

Þjóðhátíðardagur Noregs gekk í garð með pompi og pragt svo vægt sé til orða tekið. Klukkan 10 um morguninn voru við vakin með lúðrasveit og skrúðgöngu fyrir utan gluggan okkar. Það var mjög merkilegt að sjá alla lopasokkana þrama í kór í sértilgerðum lopasokkabúningum ( þjóðbúningum). Hefð er fyrir því hér að Norrmenn fá búninginn í fermingargjöf og eiga því allir yfir þeim aldri svona. Þetta magnaði bara þjóðhátíðaráhrifin.
Klukkan tvö um daginn hrukku við síðan aftur í kút í stofunni okkar en þá marseruðu tilvonandi stúdentar (það er kalllað russar á Norsku) framhjá glugganum með teknótónlist og flautur í kjaftinum. Ekki minni læti þá. Russarnir eru búnir að vera að "dimmtera" í mánuð og er þessi dagur rúsínan í pysluendanum fyrir krakkana... nú byrja prófin!
Um kvöldið fórum við í heljarinnar íslendingagrill hjá Gunnhildi og hér fyrir neðan gefur á að líta svipmyndir frá þessum degi.
Frábær dagur með sól og sumaryl....

Sma fra mer

2007-05-11T19:21:00.000+02:00

Allir að skoða þennan skemmtilega dans....

Til ykkar allra sem eru að skoða síðuna.....

http://www.carmex-kiss.de/index.php?meintanz=278836343591

Svekkjandi..

2007-05-10T23:40:00.000+02:00

Evrópa kann greinilega ekki að meta góða tónlist ...

Rauðhærða kyntröllið okkar var klárlega með skástu lögunum í þessari keppni og dansandi dívan frá Lopasokklandi kunni allaveganna að klæða sig í þrjá kjóla á sama tíma!!

Samt sem áður er hægt að hughreysta sig við það að í Eurovision er endast búið að safna saman verstu lögunum frá hverju landi .... þannig að það var bara fínt að við vorum ekki með í þeim hópi að þessu sinni!

Afhverju er maður samt alltaf jafn svekktur yfir þessari leiðinlegu keppni ... hún hefur sama skemmtanagildi fyrir mig og fegurðasamkeppnir! ... sitja fyrir framan imban og hlæja að öllu fáranlega fólkinu á sviðinu... sorglegt en á sama tíma fullnægjandi fyrir sálina....

Múhahahahahahahahahahahaha

Safnandi solargeislum

2007-05-05T13:16:00.000+02:00

"Það er sko geggjað veður úti, ýkt heitt og heiðskírt. Gerum eitthvað!," segir húsfreyjan brosandi við bóndann sinn sem dæsir eftir að hafa verið hoppandi og skoppandi allan liðlangan daginn.
"Já en er í lagi að ég slappi aðeins af?! Ég er sko búinn á því í löppunum. Var látinn hlaupa 5*10 í dag plús að ég var lyfta eftir hádegi. Alveg búinn sko," segir bóndinn hendir sér uppí sófa með lappirnar upp í loft.
Húsfreyjan er nú ekki svo ánægð með þetta svar enda ekki orðin vön því að sólin skíni allan daginn og 20 stiga hiti er undir meðallagi yfir sumartíman í þessu landi. Henni langar helst að sleikja alla sólargeisla upp til agna því hver veit hvenær þeir láti sjá sig aftur. Á heimaslóðum þessara skötuhjúa er sólin nefninlega sjaldséð sjón og þau því vön að sleikja alla geisla sem brjótast gegnum skýjabakkana yfir litlu eyjunni.
Hún er að verða eins og rússi sem villist inn í Walmart á kreppuárunum. Liggur við að hún hamstri sólargeislana þannig að hún geti notað þá seinna þegar rigningartíminn hefst.
Bóndinn er að verða frekar þreyttur á þessu og notar hvert tækifæri til að minna hana á það að þau hafi nógan tíma til að njóta sólarinnar og veðurblíðunnar. Svona verður sumarið og þau eru nú íbúar í þessu landi. Hvorki sólinn né þau eru að fara neitt.

Greit.. greit ha de...

2007-04-25T21:22:00.000+02:00

Nú er þessi búseta okkar hér öll að komast í fastar skorður og maður er svona farin að komast aftur niður á jörðina eftir rússíbanareið búferlaflutninga. Tilhugsunin um að verða hluti af hinu norska samfélagi er búin að gerjast og síast inn í heilann. Við erum komin til vera og því ekki seinna vænna en að kasta enskunni til hliðar og byrja að bjarga sér á norsku (eða nánar tiltekið góðri blöndu af sænsku og dönsku með hinum syngjandi norska hreim).
Eftir að hafa talað við nokkra norrmenn í síman hef ég tekið eftir að norrmenn kveðjast ekki.. það er ekkert Bless til í þeirra orðaforða. Ég hef bæði reynt hið danska hej hej eða hið sænska hejda enda frekar óþægilegt að enda samtal án þess að kveðja. en alltaf fengið hið glaðlynda ha de tilbaka, alveg einstakt! Einnig ofnota norrmenn orðið "greit" eða æðislegt á íslensku. hmm.. já þetta er ansi jákvæð þjóð... allaveganna finn ég að viðmótið í búðunum er betra ef töluð er ofangreind norska en enska. Spes.

Núna erum við nýkomin frá lækni eða nánar tiltekið hinn ökklameiddi Viktor. Ég ákváð þó að fara með enda læknirinn staðsettur á annars órönnsökuðu svæði Oslóarborgar. Læknirinn er sérfræðingur í svona meiðslum og leit út eins og Jón Páll... massatröll sem já náði að hnykkja ökklann hans Viktors nokkurn veginn á sinn stað. Hann verður þó að fara til hans aftur fyrir helgi og vonum þá að tröllið geti nýtt krafta sína í að koma Viktori í takkaskónna á ný.

Fyrir mína parta þá fór ég atvinnuviðtal á þriðjudaginn sem gekk vonum framan. Þar gat ég nýtt mína sænsku og verð ég að segja að ég hafi komið sjálfri mér á óvart... greinilegt að þessi kunnátta geymist vel... maður verður bara að dusta af henni rykið. Ekki er alveg ljóst hvort að starfið sé mitt ennþá en þegar það kemst á hreint mun ég flytja frekari fregnir af því hér.

Framundan þessa vikuna ber hæst fótboltakvenna hittingur á laugardagskvöldið þar sem kallarnir verða skildir eftir heima og síðan er heimaleikur Lilleström við Oslóarliðið Lyn á mánudaginn. Kvíði fyrir að þurfa að taka fram fánann og flagga á ný... alveg svaðalega aulalegt svo ekki sé meira sagt að gera þetta ein.

Annars langaði okkur að deila með ykkur þessu snilldar myndbandi af norskri hljómsveit sem Viktor fékk frá snillingnum frænda sínum.

http://straumod.nrk.no/AlltidMoro/AAPArkiv300/Hurra_Torpedo_300_WM_20011221_150336.wmv

Já þetta eru norrmenn í lagi og ekki þarf að taka það fram að tónlistarmenningin hér blómstrar af tilraunamennsku.

Til hamingju Viktor!

2007-04-20T10:10:00.000+02:00

Hér hafiði það kæra fólk.... Íþróttamaður Víkings 2006!!
Var tilkynnt á sumardaginn fyrsta og því Viktor búinn að bæta enn einni fjöðrinni í hattinn sinn (plús fleiri bikurum... jess! þessi nær mér uppá mitti... aftur jess)
Næst er það bara að vera valinn lopasokkur 2007 eða kannski raunhæfara að einbeita sér að árinu 2008. Herra lopasokkur 2008 hljómar vel.

Það er búið að vera mikil dagskrá hjá okkur þessa vikuna þótt að vissulega er hljóðlegra í slotinu eftir að Garðstæðingar flugu á braut. Við fórum í matarboð til Occean liðsfélaga Viktors en hann á íslenska kærustu, Gunnhildi sem er búin að hjálpa okkur mjög mikið að komast inn í allt hér. Þar voru einnig Indriði (Sigurðsson) sem spilar í Osló með Lyn og Jóhanna kærasta hans en þau eru nýbúin að eignast litla stelpu. Það var mjög gaman að hitta loksins fólk og við konurnar gátum deilt reynslusögum af pirrandi hótelvistum og nett óþolandi norrmönnum... frjósamur jarðvegur þar á bæ!

Sprungið dekk, fótboltakvenna hittingur, þvottadagur og pípari sem malaði óskiljanlega norska málýsku eru einnig hlutar af ævintýrum vikunnar sem er að taka enda!
Viktor er betri í ökklanum en þó ekki alveg 100 % heill enn... vonandi fer þetta að koma!!

Gleðilegt sumar kæra fólk nær og fjær

ha de!

p.s eruði að djóka með markið hans Messi? algjör snilld....

Sol og bliða

2007-04-16T18:46:00.000+02:00

Já svona er útlitið búið að vera í Lopasokkalandi undanfarna viku... alveg blístrandi blíða!! Við erum því búin að dusta rykið af sólgleraugunum og sandalarnir (sem ekki hafa verið notaðir LENGI) komnir fremst í hilluna. Ef eitthvað er að marka þessa veðurblíðu höfum við sko ekki yfir miklu að kvarta í sumar.
Garðstæðingar fengu því að smakka það besta sem Noregur hefur uppá að bjóða síðastliðna viku en eru þeir nú farnir frá okkur eftir æðislega 10 daga. Takk fyrir komuna kæra fólk.... frábært að hafa ykkur hér hjá okkur!!!

Þessi mynd er tekin í Viglundsparken... frábær skemmti-og listigarður í Osló sem við vorum að uppgötva. Hann skartar þvílíkum högglistaverkum eftir Viglund og hef ég á tilfinningunni að þessi garður verði mjög vinsæll hjá okkur í sumar. Það er meira að segja sundlaugagarður með risa rennibraut..... eitthvað sem ég hélt að Lopasokkaland gæti ekki boðið upp á.

Jæja ekki meir í bili frá okkur sólbrenndu lopasokkunum...

kram

Blasið til leiks

2007-04-12T10:18:00.000+02:00

Á mánudaginn byrjaði norska deildin af fullum krafti og Lúðasröm lifnaði við. Hvert sem maður leit var fólk klætt í gulu og svörtum lit og greinilegt að allur bærinn og meira til eru harðir stuðningsmenn síns liðs. Við þurftum að (við ekki miklar undirtektir hjá mér) að setja forláta LSK fána út á svalir hjá okkur... öll gatan var því klædd gulum og svörtum lit. Norrmenn eru greinilega mjög samhentir í þessum málum því bara örfáar hræður skrópuðu í fánamálunum.

Nákvæmlega tveimur tímum fyrir leik fór svo fólk að streyma niður götuna okkar í átt að leikvanginum með sjálft lukkudýrið Kanarífuglinn í broddi fylkingar. Þetta var mikil upplifun fyrir undirritaða og gesti enda gátum við fylgst með öll frá svölunum.

Stuðningsmenn Lsk aka Kanarífuglarnir eru taldir með betri stuðningsmannafélögum í Noregi og sýndu þeir það og sönnuðu á þessu fyrsta leik. Um 11.500 manns fylltu leikvanginn sem tekur 12.000 manns allt í allt. Þetta var mikil fótboltaupplifun fyrir mig þótt að Viktor hafi ekki fengið að spreyta sig í þessum leik. Hann á við ökklameiðli að stríða þessa dagana en á að vera orðin góður eftir helgi. Það verður gaman að sjá hann spranga um í gulum búning þegar líða tekur á sumarið. Okkar menn unnu leikinn 3-0 gegn Fredrikstad og samkvæmt spám norskra fjölmiðla mun LSK lenda í einu af fyrstu þremur sætunum.

Annars er allt mjög gott að frétta af okkur, Garðstæðingar eru hér enn og því mikið stuð hjá okkur. Vilhelm Bjarki heldur uppi miklu fjöri og segist bara vilja flytja til Lopasokkalands. Þannig að Lúðaström og Noregur virðist leggjast vel í gesti okkar.
Gísli Arnar er búinn að vera í fullri vinnu við að hjálpa okkur að hengja upp myndir og laga ýmislegt á meðan Halla Guðrún er búin að vera í eldhúsinu... held að við gætum ekki beðið um betri gesti!
Nú er sól og upp undir 20 stiga hiti og er förinni heitið til höfuðborgarinnar í dag.
Ha de

Gulls igildi...

2007-04-08T19:28:00.000+02:00

Málshættirnir í páskaeggjunum eru skemmtilegastir....

Viktor: Giftu þig aldrei til fjár,
það er ódýrara að taka lán.

Álfrún : Verkfæri eru best ný,
en vinátta er best gömul.

Það er hefð á páskunum að deila málháttum með fjölskyldunni......

Hvernig málshætti fenguð þið???

Gleðilega Paska!!!

2007-04-08T12:09:00.000+02:00

Innilegar páskakveðjur yfir hafið frá okkur Lopasokkunum *********

Núna er mikið stuð í Litlastraumi enda Garðstæðingar búnir að renna í hlað og stíf dagskrá framundan. Það er nefninlega mikið skemmtilegt og forvitnilegt að sjá hér í Norge og gaman fyrir okkur að leyfa loksins einhverjum að fá smjörþefinn af okkar lífi í nýju landi.

Myndin er af Viktori með litlu Írisi frænku sína sem er strax komin í LSK stuðningsmanna búning (ekki seinna vænna....) Lítill sætur kanarí páskaungi......

Ha de

Frí... frí ...páskafrí....?

2007-04-04T21:10:00.000+02:00

Það var ekki fyrr en ég kom hingað til Noregs aftur að ég fattaði hversu stutt það væri í sjálfa páskahátíðina. Hér er ekki þverfótað fyrir páskaskrauti í öllum búðum og því sá ég mér ekki fært um annað en að spýta í lófana og taka þátt í gulu gleðinni.

Ég verð þó að viðurkenna það að ég fékk nett í magann þegar ég uppgötvaði það að ALLAR búðir eru lokaðar frá fimmtudegi til þriðjudags!! ....og 5 manna fjölskylda væntanleg til okkar á morgun.... já ég var hálfpartinn búin að treysta því að geta bara lært af Höllu Guðrúnu í eldamennsku og innkaupaferðum enda er það ekki mín sterkasta hlið!!! Búin að fara tvisvar sinnum í búðina og snúast hringi (þrátt fyrir að vera með tossamiða) og ég er ennþá með það á tilfinningunni að ég hafi gleymt einhverju....!!

Það er ótrúlegt hvað maður kemst alltaf meira og meira að því hvað Íslendingar keppast við að vinna sem mest og það virðist bara vera skandall ef það er eitthvað lokað... ég verð að viðukenna að norski stíllinn er að koma sterkur inn hjá mér.

Nú er bara verið að skúra, skrúbba og bóna hér á Alexander Kiellandsgötu í hlýju vorsólinni... ótrúlega hvað gott veður og hlýtt veður léttir lundina...

Já Noregur ætlar greinilega að flagga sínu fegursta fyrir Garðstaðabúa.

Ha de

Hið fagra föðurland... er hægt að eiga tvö....

2007-04-03T19:09:00.000+02:00

Jæja þá er hin óvænta og stutta ferð til föðurlandins liðin undir lok. Lopasokkalandið sýndi að það er mjög góður erfingji krónu föðurlandins fyrir okkur með 15 stiga hita og sól. Eftir viku í rigningunni á Íslandi var gott að koma út í hlýjan andvara og fersk fjallaloftið hér. (Heyriði hvað ég er að verða jákvæð....!?)

Það var gaman að sletta aðeins úr klaufunum á Íslandi og virkaði eins og vítamínsprauta á mig. Jafnframt ágætt að sjá að ekki mikið hefur breyst á landinu þrátt fyrir 3 mánaða fjarveru okkar... lífið gengur sinn vanagang fyrir utan einn nýjan fjölskyldumeðlim hjá Viktori sem ég var svoo heppin að sjá... hin hárprúða Íris slær mörg met í krúttleika.

Ég náði að koma heim frá Íslandi með ferðatösku í yfirvikt enda full af harðfiski, osti og kaffi. Já.... sumt getur maður bara ekki verið án.

Skrýtið er þó að eyða deginum hér ein án Viktors sem staddur er við Afíkustrendur með ís á ökkla eftir leiðinda fall á æfingu. Annars hefur honum gengið vel úti og spennan hér í Noregi er að magnast enda byrjar deildin á Mánudaginn og auglýsingar út um allt. Fyrsti leikur Viktors er heimaleikur gegn Fredrikstad á mánudaginn. Lýsingu á leiknum má finna á þessari síðu (reyni að gera eins vel og ég get)

Nú stendur þó undirbúningur komu tengdafjölskyldunnar í hámarki enda bara tvær dagar þangað til. Fleiri fregnir af því síðar....

Takk fyrir mig á Íslandi kæra fólk.....!!!!

ha de

Lopasokkar aðlagast og þorna

2007-03-23T10:10:00.000+01:00

Að vakna við fuglasöng og hlýja geisla sólarinnar á hverjum morgni lýsir lífi okkar hér Lilleström vel. Hér er styttist í bjartari tíma og af veðrinu undanfarna daga að dæma mun þetta sumar verða mjög gott (allaveganna fyrir klakabúa eins og okkur). Nú er bjartsýnisröddin farin að hljóma úr vitum okkar vegna þess að nú fyrst getum við farið að hreiðra um okkur hér í Lopasokkalandi af einhverri alvöru. Við erum ekki lengur langtíma gestir í ókunnugu landi.

Eftir að hafa búið hér í tæpa 3 mánuði erum við farin að kunna betur og betur á norsk samfélag með hverjum deginum. Við getum bæði hraflað okkur nokkurn veginn í gegnum fréttatímana í sjónvarpinu og Viktor er meira að segja komin með sinn uppáhaldsspurningarþátt í sjónvarpinu (ég sit reyndar við hliðná sem lifandi orðabók). Búið er að velja uppáhaldsmatvörubúð og nokkurn veginn bera saman verðmunin á Íslandi og Noregi ( sama og enginn). Ikeaferðir hafa verið óteljandi enda þegar farið er úr 50fm íbúð í 70fm vantar ýmislegt til að fylla uppí plássið. Hvað er þá betra en þessi sænska snilldarbúð sem nota bene er opin öll kvöld til 23!!

Viktor heldur áfram ströngu æfingarplani og í síðasta leik fékk kallinn heilar 20 mínútur!! Hann stóð auðvitað vel og átti þátt í einan marki liðsins gegn liði Valeregna en leikurinn endaði í jafntefli. Á mánudaginn heldur hann síðan af landi brott til Spánar enn á ný en í þetta sinn er förinni heitið til Marbella strandarinnar. Þar er ætlunin að dveljast í 12 daga í lokaundirbúningi fyrir deildina (Tippeligan) sem síðan hefst 9.apríl með heimaleik. Ég verð þar í stúkunni ásamt fögru föruneyti og verður eflaust mikið fagnað ef Viktor verður þess heiðurs aðnjótandi að koma inná enda aðalaðdáendurnir komnir til Lopasokkalands þá.

Ég hef alveg verið að lifa mig inní húsfreyjuhlutverkið sem hefur staðið mér ansi fjærri þar til nú. Hér hefur verið eldað á hverjum einasta degi síðan við fluttum enda löngunin eftir heimalöguðum mat verið ólýsanleg á hóteltímum. Eina sem vantar eru fleiri uppskriftir, heilinn minn virðist tæmast þegar komið er inní matvörubúð og það sama oftast keypt. Lýsi hér með eftir góðum uppástungum og ekki væri það slæmt ef um mömmumat væri að ræða (frekar langt að sækja í það hér )
Þrátt fyrir að vera með þvottvél í eldhúsinu höfum við aðgang að hinu fínasta þvottaherbergi í næstu blokk. Þar er ein þvottvél og þurrkuaðstaða. Þannig að ég hef nú tvisvar lagt leið mína með stóran þvottapoka yfir í næstu blokk. Mjög útlandalegt og skemmtilegt, mamma þú ættir nú að kannast eitthvað við þessar hefðir...?

Það er því farið að birta til í lífi Lopasokkana og sjáum við fram á enn bjartari tíma með hækkandi sól...

HA DE

Okkar fagra slot

2007-03-21T10:50:00.000+01:00

Hér gefur á að líta nýja skenkinn okkar sem handlagni heimilisfaðirinn setti saman með aðstoðarkokki sínum (fáránlega þungur að bera upp stigana).. gamli góði stólinn plummar sig líka rosalega vel hjá arninum (gott lestrarhorn fyrir lestararhesta)

Stofan er ótrúlega rúmgóð og sófarnir þægilegir eins og sjá má (stofuborðið fylgdi með íbúðinni en því verður skipt út í bráð...)

Barinn fékk auðvitað heiðursæti í stofunni ásamt eldhúsborðinu sem minnkar ótrúlega í hinni stóru stofu... en okkur þykir vænt um það því það er svo fínt....

Svefnherbergið stendur svo fyrir sínu nema það er fáránlega stórt skápapláss sem við eigum ennþá eftir að venjast... ekki einu sinni okkur tískuljónunum hefur tekist að fylla það... enn...

Eldhúsið er svo komið með "þórsgötulegan" blæ yfir sig og eins og þið sjáið erum við að reyna að gera okkar besta við að innleiða kúlið inn í Lúðastraum...
Það mun koma með kalda vatninu....

Vonandi sefa þessar myndir forvitnilegan þorsta ykkar augna enda fyrirspurnir um myndir búnar að vera óendalegar.... gaman...!!

Ha de

Komin til að vera!!

2007-03-16T21:16:00.000+01:00

Við viljum biðja gesti og gangandi velvirðingar að þessu sinnuleysi okkar varðandi skrif að undanförnu. Erum netlaus til þriðjudags en skutumst frá núverandi HEIMILIS til þess fyrrverandi (hótelsins) til að stelast á netið enda nauðsynlegur partur af lífi manns þegar maður býr í útlöndum!!

Ætlum bara að skrifa stutta kveðju þar sem það er erfitt að slíta sig frá hinu æðislega heimili sem við erum búin að útbúa okkur í hjarta Lúðaström! Myndir munu koma í næsta viku fyrir aðdáendur !!

Takk fyrir hjartnæm komment og það er greinilegt að margir hafa hugsað til okkar síðastliðin Föstudag þar sem flutningarnir gengu eins og í sögu... það er að minnsta kosti byrjað að grilla í upphandleggsvöðva á minni sem aldrei hafa verið til staðar áður!! fleiri sögur af því síðar....

Þangað til HA DE!!

p.s Hemmi : Kalt vatn og að smellla pönnum saman virkaði vel í landsliðsferðum hjá Vikka!! Gangi þér vel!!

Föstudagur til fjars

2007-03-08T16:43:00.000+01:00

Loksins eru tímar ferðataskna og hótelvista á enda fyrir okkur lopasokkana!! Hin gullfallega íbúð verður okkar á morgun klukkan 18.00!! Flutningarfyrirtækið virðist þó vera að gera allt sem í þeirra valdi stendur til að gera þetta okkur erfiðara fyrir en við ætlum ekki að láta deigan síga, á morgun munum við gista í okkar eigins rúmi í okkar eigins rúmfötum. Get ekki beðið og við munum láta það gerast sama hvað það kostar... Ég mun meira að segja reyna að halda á níðþungu dýnunni okkar alein ef það er það sem þarf til að koma dótinu upp í íbúðina!!

Núna erum við búin að skipta um hótel og erum á Gardemoen í óbyggðum aftur.. en vitiði það er bara allt í lagi því við gistum í ÍBÚÐINNI á morgun !!!

Inga Rósa vinkona var hér í vinnuferð fyrr í vikunni (óvæntur glaðningur enda Osló ekki í alfaraleið fyrir þá sem við þekkjum) Þannig að við lopasokkarnir héldum í siðmenninguna til að fá fréttir og slúður að heiman beint í æð. Það var algjör vítamínsprauta að sjá kunnuglegt andlit loksins !! Inga takk fyrir að koma !!!

Þessa stundina kemst lítið að hjá okkur annað en að innrétta íbúðina í hausnum og skipuleggja flutningana. Fyrri flutningarhjálparkokkum er sko sárt saknað....það er svo gott að eiga góða að!!

Eftir mánuð munum við fá okkar fyrstu heimsókn hingað til Lúðaström g ekki er hún að verri endanum. Sonja, Vilhem Bjarki, Halla Guðrún, Gísli Arnar og monsa Sonjudóttir eru búin að staðfesta komu sína hingað 5. apríl og það verður sko kærkomið stuð!!! Hlökkum til!

Veit ekki hvernig netsambandið verður næstu daga en ég mun reyna að setja inn frekari fregnir af flutningunum sem fyrst!!

Biðjum ykkur að hugsa til okkar í hádeginu á morgun ... þá mun erfiðið byrja.... þangað til...

Ha de

Af kennitölum og veikindum

2007-03-01T13:16:00.000+01:00

Það var mjög einkennilega þægilegt að koma aftur hingað til Lúðaström eftir fjarveruna. Gott að kannast við sig... já ekki líður á löngu þangað til að við förum að kalla þennan krummaskurð heimili. Ég er eiginlega farin að prísa mig sæla að hafa ákveðið að festa rætur hér í staðin fyrir Osló, þar er nauðgunafaraldur þessa stundina (fréttatímarnir einkennast af þessum fregnum) og glæpnatíðni er víst að aukast með hverjum deginum. Lúðaström hefur því fengið á sig geilsabaug undanfarna daga.

Viktor greyið var svo fárveikur á þriðjudaginn, með mígreniskast og ældi á 15 mínutna fresti frá 15 um daginn til 22 um kvöldið. Læknarnir hér sögðu að þetta væri bara pest sem væri að ganga og sögðu honum að drekka bláberjasafa !? Þegar leikar stóðu sem hæst hjá Viktori greyinu var ég alvarlega farin að spá í að hendast með hann upp á spítala... en eitt babb var í bátnum því ég hef ekki hugmynd hvar hann er! Mjög mikilvægt að vera búin að spá í svona hluti áður en eitthvað alvarlegt kemur uppá. Verkefni vikunnar er því að komast að hvar næsta sjúkrahús og lögreglustöð er.... bara svona til öryggis.
Ekki þurfti nú samt að grípa til neyðarúrræða þetta kvöldið og nú er kallinum batnað og farinn að trítla á eftir boltanum á ný!

Í gær fékk ég loksins inngöngu inní hið norska samfélag.... komin með bráðmyndarlega 11 stafa kennitölu og bankareikning... sem og Viktor. Nú getum við loksins farið að gera eitthvað af viti hér og sett okkar mark á Noreg af fullri alvöru!!!

Sótti um háskólan í Osló í gær... Fjölmiðlafræði í fyrsta val og já ...kynjafræði í annað val.!? panikkaði aðeins og valdi það bara...veit ekki alveg afhverju... vonandi kemst ég inn í fjölmiðlafræðina. Fæ samt ekki að vita neitt fyrr en 26.júlí!!

Vegna fjölda áskorinna ákvað ég að setja þessa mynd inn á af hinum sköllótta Vikka...hann ber sig með eindæmum vel svona hárlaus ekki satt?
Hér er hann stoltur af "listaverkinu" sínu (eins og þið sjáið erum við orðin nett skrýtin af þessari hótelvist sem þó fer að styttast)

Ha de

Aftur til fortiðar....

2007-02-26T15:52:00.000+01:00

Ha ha ha... Aldís var að láta mig fá þessa skemmilegu mynd af mér lítillri... tíhí... algjör bolla!! Langaði bara að deila henni með ykkur, það er alltaf gaman að taka smá ferðalag aftur um nokkur ár .....

Stormur i formi slyddu

2007-02-24T17:36:00.000+01:00

Nú er farið að styttast í annan endan á dvöl mini hér hjá hinni elskulegu litlu fjölskyldu við Eyrarsund. Eftir tvo daga mun Lúðaström taka á móti mér með opnum örmum... það er að segja ef ég kemst þessa stuttu leið yfir!! Fyrir nokkrum dögum byrjaði að snjóa hér í danaveldi og þeir eru ekki alveg að höndla þetta álag... fréttirnar segja frá snjóstormi en út um gluggan falla bara nokkur snjókorn í takt við örlítið rok. Danir eru algjört met, almenningsamgöngur í lamasessi og flugi frá Kastrup frestað. Vonandi verða þeir nú samt búnir að ná tökum á þessu greyin á mánudagsmorguninn því ég er farin að hlakka mikið til að sjá sólbrúna fésið á hinum lopasokkinum. Hann ákvað að taka af sér allt hárið á Spáni (mér óaðvitandi) og því er ég spennt að sjá skallann á kallinum. Viktor á að koma til Noregs í dag og ég vona að það muni gerast áfallalaust enda eru norrmenn mikið vanari snjó en hinir kærulausu Danir.

Á meðan ég hef dvalið hér í góðu yfirlæti hjá listaparinu og hinni sístækkandi og bráðskemmtilegu Magneu, hef ég fengið að gægjast inn í annan heim. Heim sem ekki var mér mikið kunnur fyrir þessa dvöl. Ég er að tala um veröld foreldra, full af ákvörðunum og vagnabrölti. Viðurkenni að mér hafi liðið stundum eins og ísbirni á sólaströnd, ekki alveg að falla inn í hópinn og pínu út úr kú... enda veit eg lítið um bleyjur og uppeldi. Þessi tími er því búin að vera ágætis lærdómur fyrir mína.

Aldís tók mig með sér í "babybíó" sem er morgunbíósýningar fyrir nýbakaðar mæður sem bíóhúsin bjóða upp á hér til að leyfa mömmunum að sjá nýjustu myndirnar. Þangað flykkjast mæðurnar með barnavagnana þar sem þeir eru númeraðir og afgreiðslufólkið vaktar þá. Svo ef að barn byrjað að gráta í vagninum eru númerin kölluð upp í salinum. Mjög fyndin og skemmtileg reynsla að fara klukkan 10 um morgun í bíó... aldrei gert það áður. Þetta mundi örugglega vekja mikla lukka heima.

Takk fyrir öll skemmtilegu kommentin... það er gott að vita að þið þarna á klakanum munið ennþá eftir lopasokkunum!!

Lukka yfir hafið

Timarnir breytast og mennirnir með....

2007-02-19T14:30:00.000+01:00

Faðir minn hefur ákveðið að hætta starfi sínu sem útgáfustjóri Eddu, ég verð að viðurkenna að mér finnst þessi tímamót svolítið skrýtin enda er ég ekki ein um þá skoðun að foreldrar manns eigi að halda uppteknu hætti. Það er alltaf eitthvað öryggi sem fylgir því. Faðir minn er þó endast að auka sitt persónulega svigrúm (eins og mamma orðar það) og mun halda áfram að sitja í útgáfustjórn Eddu og sjá um "sína" höfunda. Einnig ætlar hann að sinna sínum málum (það eru mörg járn sem hann hefur í eldinum) og fyrir þá sem ekki vita á hans maður (Jónas heitinn Hallgrímsson) 200 ára afmæli á þessu ári og hefur hann því í nógu að snúast. Þegar maður er búin að setja sitt mark á Íslandssöguna eins og Jónas fær maður heilt ár til heiðurs sér ekki bara einn dag eins og við hin. Ekki slæmt það....

Þetta er merkis fréttir að mínu mati og langaði mig að deila þessu með lesendum þessarar bloggsíðu. Ég sem ætlaði jafnvel að nýta/misnota aðstöðu mína sem dóttir útgáfustjóra og koma með hugmynd að bók.... ( Draumar lopasokka var vinnuheitið á bókinni hehehe) en það er nú runnið út í sandinn. Hefði heldur örugglega ekki plummað mig vel sem rithöfundur... er of hörundsár til að komast í gegnum alla gagnrýnina sem fylgir því starfi.

Smá skúbb á þessum gráa mánudegi

Ha de....

Kanarifuglinn syngur og hjalar....

2007-02-18T20:27:00.000+01:00

Hér gefur að líta nýjustu viðbótina í stuðningsmannahóp Lilleström (og þá náttúrulega mest við leikmann #16 !!), og nýju bestu vinkonu mína. Lífið er búið að vera ótrúlega ljúft hér í Danmörku og ungfrú Magnea stækkar með hverjum deginum. Hún er byrjuð að segja "Vá vá vá" í tíma og ótíma. Það er sem sagt hennar fyrstu orð og ég held bara að "Ála" verði orð númer tvö, er allaveganna byrjuð að vinna í því í laumi hehehe!!

Í gær fórum við öll á listasýningu Ólafs Elíassonar og Kjarvals sem stendur nú yfir hér í Köben, sýningin ber nafnið Lavaland og var ótrúlega mikið flott sem fyrir augum bar enda eru þarna á ferðinni tveir frægustu listamenn sem Ísland hefur alið, þó eru nú einhverjar deilur um það enda vilja Danir meina að Ólafur sé danskur....þeir hafa alltaf viljað eigna sér allt sem við íslendingar gerum gott...( eða er það ekki??) en við kaupum þá bara upp til agna á endanum í staðinn...

Í dag er sjálfur konudagurinn og Sindri greyið hefur nú alveg 3 konur á heimilinu til að sjá um og fengum við heimabakaða skúffuköku í tilefni dagsins nammi namm!!

Viktor er orðin frekar leiður á Spánardvölinni enda er þetta frekar langur tími (14 dagar allt í allt) en hann fékk þó kærkomið frí frá æfingum í gær. Dagurinn var tekinn á golfvellinum enda langt síðan Viktor hefur komið við golfkylfuna (hann kom þó ekki nálægt John Arne Riise með henni.... bara svona svo það sé á hreinu!!)

Lopasokkalandið bíður okkar með eftirvæntingu og þegar þangað er komið fer nú að styttast í annan endan á hóteldvölinni... jesss!!
Ég er byrjuð að innrétta íbúðina í hausnum og ekki skemmir fyrir að hafa alla þessa flottu dönsku hönnun út um allt!!

Jæja ekki meira í bili frá mér.. er að fara að borða íslenska Ýsu a´la Sindri (það er víst annað sem maður á að taka með sér frá íslandinu góða og geyma í frystinum...það gerir að minnsta kosti fóstufjölskylda mín...hehehe)

Biðjum að heilsa yfir hafið

Kongsins Köben...

2007-02-15T13:10:00.000+01:00

...það er alltaf eins og að koma heim þegar maður stigur fæti á Ráðhústorgið með Strikið fyrir augunum og pulsufnykinn í nösunum. Kaupmannahöfn er ekki kölluð kóngsins köben fyrir ekki neitt, pínulítið fyrir svona fólk kennt við Lúðaström eins og mig að komast inn í siðmenningu!

Hér líða dagarnir eins og klukkutímar og nýt ég þessa að fylgjast með litlu fjölskyldunni á Öresund. Magnea er orðin frekar skæð, byrjuð að standa upp við hvað sem er og það má ekki líta af henni augunum þá er hún þotin á braut. Það er eins og hún sé aðeins OF gáfuð og dugleg miðað við aldur.... hehehe...Hún er svooo sæt... langar helst að taka hana með mér til Lúðaström.... hún mundi allaveganna aldeilis stytta mér stundirnar þar á bæ !!

Aldís og Sindri eru búin að kenna mér helling um það hvernig maður á að haga sér þegar maður er búsettur í útlöndum. Eins og að horfa á Kastljósið á netinu til að fylgjast með fréttum að heiman. Kaupa kokteilsósu og pítusósu í fríhöfinnni því jú það er nú svona sér íslenskt dót. Einnig eru þau búin að kynna fyrir mér helling af dönskum bíómyndum og er planið að ná að horfa á þær allar áður en ég fer heim... Þau eru svoo góð við heimilislausa unglinginn (mig).

Viktor hefur það mjög gott á Spáni, einfaldir dagar sem innihalda æfingar og matarpásur! Veðrið er víst mjög gott og kallinn er búin að taka smá lit .... (sem þýðir að húsfreyjan þarf að fara að vinna aðeins í húðlitnum á sér áður en hann kemur tilbaka) Hann fer bráðum að vera kallaður 10 mínutna maðurinn frá Íslandi enda fær hann ekki að spila fleiri mínutur í hverjum leik... en vonandi fer það nú að batna... okkar maður á nefninlega miklu fleiri mínutur skilið.. allaveganna korter ;)

Eins og þið heyrið er allt frábært að frétta af lopasokkunum i bili...

Hilsen

Fall er fararheill...

2007-02-12T15:51:00.000+01:00

Já skulum við svo sannarlega vona... því við lopasokkarnir komumst sko ekki klakklaust frá Noregi á Laugardaginn var.
Það byrjaði þannig að við sváfum yfir okkur, vöknuðum á sama tíma og rútan frá LSK átti að leggja af stað út á flugvöll með öllu liðinu. Sem betur fer vorum við á hóteli rétt hjá flugvellinum og ákváðum þá hið snarasta að keyra, flugin okkar áttu að fara að sama tíma... við enduðum með að þurfa að rúnta um flugvallarsvæðið til að finna bílastæðin, með forráðamenn liðsins á hinni línunni að reka á eftir kappanum (þið getið rétt ímyndað ykkur andrúmsloftið inní bílnum) svo þegar á bílastæðið kom þurftum við taka rúta að flugvellinum sjálfum. Þegar við vorum að fara að anda léttar og stíga uppí rútuna kom punkturinn yfir i-ið.......

Viktor gleymdi VEGABRÉFINU..... jebb við hlupum með allan faragurinn aftur að bílnum til að leita að vegabréfinu ( held að við höfum bæði verið við það að fá tauga- og hjartaáfall) ... sem betur fer tókst okkur að finna það að lokum og já til að gera langa sögu stutta... sit ég hér á Öresundskollegiet blokkH íbúð 608 í góðu yfirlæti hjá mínu elskulega frændfólki og Viktor er í 20 stiga hita og sól sprangandi um á samfesting að elta bolta ásamt helling af öðrum fótboltaköppum. Já þetta tókst að lokum!!!
Mætti halda að lopasokkalandið hafi ekki fyrir neinn mun viljað missa aðal lopasokkana úr landi!!! Við vorum bæði sammála um það að þetta væri einn hræðilegasti morgun sem við höfum upplifað!!

Reyni að vera duglega að skrifa hér í Danaveldi og gefa ykkur fréttir af La Manga mótinu... Lilleström er búinn að spila einn leik við Brann og töpuðu 1-0.... næsti leikur er síðan við sjálf Reykjavíkurveldið (KR) á valentínusardaginn... spennandi að fylgjast með því ...!!

Bestu kveðjur yfir hafið

Mögulega... omögulega mögulegt

2007-02-09T15:16:00.000+01:00

Ef einhver hefði sagt við mig fyrir tveimur árum síðan að í febrúar 2007 mundi ég vera ... flutt búslóðarflutningum til Lúðaströms í Noregi, væri búin að búa á hóteli í mánuð, ég væri keyrandi út um allt á 100 km hraða á hraðbrautum, byrjuð í háskóla og allt þetta til að elta æskuástina Viktor þar sem hann ætlaði að spranga á eftir leðurtuðru fyrir allan peninginn... ég held að ég hef hefði dáið úr hlátri og sagt manneskjunni að dreyma áfram (dream on ) ... og haldið áfram að selja tuskur í verslunarmusteri dauðans.

En hið ómögulega er mögulegt...... fyrst að þetta varð að raunveruleika er allt hægt....!!

Ætli allt sé ákveðið fyrirfram eða spinnum við okkar eigin lífsleiðarvef?

já bara svona smá hugleiðing í skammdeginu!

ha de....

Til hamingju.....

2007-02-08T10:27:00.000+01:00

Sonja, Grétar og Vilhelm Bjarki með nýjustu viðbótina í fjölskylduna!!!
Stúlka var það, 3650 gr eða 15,5 merkur, já kjarnakona þar á ferð. Hlökkum mjög mikið til að bera dýrgripin augum sjálf enda eins og þið sjáið er hún gullfalleg (og ponsu lítil!!)

Innilegar hamingju og heillaóskir yfir hafið frá okkur hér, kæra litla fjölskylda!!!

Knús

Þjoðarstolt norrmanna borið augum

2007-02-06T09:59:00.000+01:00

Loksins fannst okkur vera komin tími til að skoða hinn fræga skíðastökkapall "Holmenkollen" sem gnæfir yfir Oslóarborg. Við vorum oft búin að sjá hann uppí fjalli en vissum ekki alveg hvernig við kæmust þangað. Þannig að enn og aftur var kortið tekið upp á laugardaginn, þessi kortalesning mín er nýr hæfileiki sem ég var að uppgötva og kemur sér einkum vel í svona aðstæðum. Duga eða drepast!!
Já Norrmenn eru mjög stoltir af þessum stökkpalli sínum og þegar við komum þangað skildum við afhverju... þetta er ekkert smá mannvirki. 136 m á hæð og fyrir neðan er gryfja þar sem skíðastökkkallarnir lenda. Vá hvað ég er farin að bera mikla og nýfundna virðingu fyrir skíðastökksfólki. Við vorum nefnilega alvöru túristar og fórum í svona skíðastökkhermi... jebb það var alveg eins og maður væri að stökkva sjálfur! Það var rosalegt... Þetta er ekki sport fyrir fólk með almenna skynsemi en samt sem áður ein af tveimur þjóðaríþróttum normanna!! hvað segir það ykkur?

Útsýnið var rosalegt frá þessum svæði og sáum við yfir alla Osló enda var veðrið með eindæmum gott þennan dag. Það er alveg á hreinu að allir sem hingað koma í heimsókn munu fá að sjá þennan magnaða stað.

Annars er allt í góðum gír hér... ég að fara til minnar elskulegu frænku og fjölskyldu á laugardaginn... hlakka ekkert smá til og Viktor til Spánar í hjólaferð (aka. æfingaferð).

Það er eitthvað að gerast hjá Sonju systur í dag (hún er sko ólétt fyrir þá sem ekki vita...) það gæti verið að litla prinsessan ætli að líta dagsins ljós í dag.. þannig að við bíðum spennt hér handan við hafið eftir fleiri fregnum varðandi það mál!!
Þessi dagur væri alls ekki slæmur þar sem amma Erna á afmæli í dag og væri það ekki leiðum að líkjast fyrir dömuna.. Til hamingju með daginn amma!!!

Ha de.....

Lopasokkarnir

Loksins komin með heimili i Lopasokkalandi

2007-02-02T17:42:00.000+01:00

Jæja.. hef ekki þorað að skrifa neinn pistil síðustu daga vegna mikillar húsnæðisóvissu... en nú er allt komið á hreint!!! Eftir mikla baráttu í dag um íbúðina varð hún loksins okkar klukkan 14.00 í dag!!
Verðið fór þó aðeins hærra en við höfðum hugsað okkur í byrjun en við náðum að pranga öllum eldhústækjum inní verðið(ísskáp, uppþvottavél, örbylgjuofn, eldavél og þvottavél) Tvennt af þessu höfum við aldrei átt áður þannig að ég er mjööög ánægð!!

Við erum búin að brosa út að eyrum í allan dag og hótelvistin er bærilegri þegar maður sér loksins fyrir endann á henni !! Við fáum íbúðina afhenta þann 15 mars og býst ég ekki við öðru nema við reynum að flytja inn samdægurs... eða ég veit að við flytjum inn samdægurs!!

Viktor spilaði æfingaleik í dag og fékk enn og aftur að koma inn á í 10 mín í lok leiksins... nái þó að gera góða hluti og heillaði meðal annars áhorfendur upp úr skónum! Leikurin fór 1-0 fyrir okkar mönnum. Áhangendur Lilleström kalla sig Kanarífuglana og eru byrjaðir að kalla Viktor hinn nýja Heiðar Helgusson (fótboltamann sem var víst mjög vel liðinn þegar hann var að spila með LSK). Það er alltaf gott að hafa stuðningsmennina með sér í liði.

Á morgun er víst eitthvað íslendingaball hér í Osló... hmmm ekki alveg okkar tebolli en kannski maður skelli sér bara í gleðina til að blandast inn í hópinn... höfum svo sem gott af því að taka nokkra snúninga á dansgólfinu, sjáum til... fleiri fregnir af því síðar!!

Hér sjáið þið íbúðina okkar... minnir óneitanlega á Frödingsgötuna í Svíðþjóð fyrir þá sem muna eftir því.. múrsteinshús og svona..!!

Jæja fyrstu gleðifregnirnar hér úr herbúðum okkar lopasokkahjúa en vonandi ekki þær síðustu...!!

Ha de...

Norrmenn eru...

2007-01-31T11:51:00.000+01:00

1. Líkams-og heilsuræktarfrík : Hef ekki enn séð eina manneskju sem er yfir meðalþyngd sem þykir frekar merkilegt í nútímasamfélagi og auglýsingar í sjónvarpi og blöðum einkennast af heilsu og fæðubótaefnum. Einnig er varla þverfótandi fyrir skokkandi fólki hér.

2. Háðir gönguskíðum : Ef þeir eru ekki á gönguskíðum um allar trissur, ganga þeir um með þau undir hendinni ( taka þau meira að segja með sér inní matvöruverslanir.) Allir bílar eru einnig útbúnir svona skíðagrindum eða kössum upp á þakinu.

3. Gera ekkert óvanalegt : Allt sem þeir gera en nákvæmlega samkvæmt bókinni og bregða ekkert út af vananum. (Ef maður biður um franskar..fær maður eina frönsku á disk.. jebb við höfum lent í því )

4. Klæða sig samkvæmt veðri : Annar mikill munur á íslendingum og norrmönnum. Hér er kraftgallinn mikið notaður þó svo að ég held aðflestir geri sér grein fyrir að hann er og verður ekki í TÍSKU. En hann er hlýr og það er það eina sem skiptir máli, sáum meira að segja einn mann 30+ á veitingastað sem var klæddur í blárri og hvítri prjónapeysu með hreindýrum framan á... ójú.. öryugglega og vonandi bara af því að hún var hlý!!

Ofangreind atriði eru það sem við erum búin að komast að um land og þjóð á þessum þremur vikum sem við erum búin að búa hér... munum eflaust komast að fleiri og fleiri atriðum þegar líður á .... þangað til ....!!

Ha de....;)

p.s fáum að vita um íbúðina á morgun.. jææks..!!

Aftur og aftur og aftur a ny

2007-01-29T11:39:00.000+01:00

Langaði bara aðeins að flikka upp á síðuna með þessari skemmtilegu mynd... erum að verða eins og gömul hjú í alveg eins fötum!! Höldum uppi heiðri Íslands hér enda Aftur eitt flottasta íslenska fatamerkið ...

Af elgum og Astrup Fearnley

2007-01-28T13:04:00.000+01:00

Kuldinn í Noregi er sem betur fer búin að minnka um nokkur stig upp á siðakastið þannig að loksins er orðið líft utandyra á ný. Erum búin að skipta um hótel og vorum svo heppin að eina lausa hótelið um þessar mundir er hótel hjá Gardemoen flugvellinum, já kæru vinir Lúðaström fékk allt í einu mikinn glæsibrag yfir sig!! Umhverfið í kringum hótelið er bara skógur og svo er svona aðvörunarskilti um elg-hættu á öllum vegum hér í kring, og ég veit til þess dæmi að elgar hafi drepið menn ! en allt í góðu... við ætlum að reyna að skipta um hótel eftir helgi!!

Góðu fréttirnar eru þær að ég er byrjuð að keyra, þeysist um hraðbrautirnar eins og ekkert sé sjálfsagðara... fyrir utan smá svitaköst og pirringsköst af og til þegar bílarnir í kringum mig eru að gera eitthvað vitlaust... heheh!!

Viktor spilaði æfingaleik á föstudaginn sem fór 3-0 fyrir Lilleström... jesss og Vikki fékk 10 mín í lokinn! Sá ekki leikinn en Viktor sagði að Lilleström hefði malað hitt liðið... vona bara að Viktor fái fleiri mínutur næst svo að Lilleström fari að slátra hinum liðunum....!! Já hef alla trú að mínum manni..!!

Í gær héldum við í bæjarferð til Osló... fórum á Astrup Fearnley nýlistasafnið sem ég var búin að heyra mjög góða hluti um! Safnið stóð aldeilis undir væntingum, sáum verk eftir listamennina Richard Prince, Matthew Barney o.fl. Prince er nýji uppáhaldslistamaðurinn minn!! Lentum líka í því að hitta Íslending hér í Osló í fyrsta sinn... Safnvörðurinn á safninum var íslensk ... mjög indæl kona sem ég þó náði ekki nafninu á ... hún stoppaði okkar, greininlega mjög hissa á því að hitta íslendinga á þessum slóðum!

Einnig vill ég koma því á framfræri að við þurftum að spyrja til vegar í gær því við fundum ekki safnið góða, í fyrsta sinn sem við höfum stoppað fólk útá götu til að spyrja til vegar ... og ég var gjörsamlega hunsuð!!! Reyndar bara af einni konu en það náði að rista djúpt á sálina... þorði ekki að spyrja til vegar eftir það!!

Mitt móttó: að vera alltaf kurteis við útlendinga!!!

Af íbúðarmálum er það að frétta að við erum búin að bjóða í eina í búð sem er í Lilleström, rosalega fín og öll núuppgerð íbúð!! Fáum ekki svar við tilboðinu fyrr en eftir helgi... við vonumst bæði eftir að fá þessa íbúð enda viljum fara að hefja þetta líf okkar hér í bráð...!

Ekki meir í bili... (treystum því að allir leggist á eitt við að biðja fyrir okkur og íbúðinni góðu)

Frosnar svitaperlur i fyrsta sinn

2007-01-23T13:22:00.000+01:00

Já svona er útlitið í Noregi um þessar mundir enda ég ekki búin að koma við stýrið á bílnum síðan ég kom! Það er um 11 stiga frost og því nýstir inn að beinum um leið og maður fer út um dyrnar... geri ekki mikið af því núna!! Fótboltinn gerir þó engar undantekningar vegna veðurs og Viktor greyið er látin hlaupa úti eins og ekkert sé... skeggið hans var allt í grýlukertum eftir hlaupin... í fyrsta sinn sem það kemur fyrir!!

Í augnablikinu lifum við mjög einföldu lífi.. hótellíf er ljúft mundu sumir segja... skoðun mín á því breytist með hverjum deginum! Það er auðvitað þægilegt að láta búa um rúmin fyrir sig, skipta um handklæði og klósettpappír á hverjum degi og fara út að borða á hverju kvöldi... en núna erum við farin að kunna enn betur að meta það að eiga eigið heimili og fá heimalagaðan mat!! Getum ekki beðið að losna af hótelinu... ég er meira að segja búin að lofa sjálfri mér því að ég skal elda á hverju kvöldi.. erum hvort eð er búin að prufa alla veitingastaði í Lilleström (þeir eru nú ekki svo margir)!

Í gær fórum við á uppáhaldsstaðinn okkar hér í tilefni dagsins en það er indverskur staður! Fengum okkur svo sterkan mat að mér verkjaði í eyrum allt kvöldið...(eins og í teiknimyndunum) hef aldrei lent í því áður og næst bið ég um medium sósu ekki hot!!! Ætluðum í bió en bíóhúsum hér taka sér það bessaleyfi að sýna þær myndir sem þeim hentar á þeim tíma sem þeim hentar .. þannig að það er ekki hægt að stóla á neitt... bara að mæta og vona að maður verði heppin býst ég við!!

Jæja ekki meira í bili héðan úr norsaraveldinu

Gaman... saman...

2007-01-22T21:35:00.000+01:00

Hér sjáið þið nokkarar myndir af okkur lopasokkahjúum..... afmælisbarnið var í essinu sínu ...!!!
P.s klæddur í eina af afmælisgjöfunum..;)

Hann a afmæli i dag...dadarada....!!!

2007-01-22T14:41:00.000+01:00

Já það er rétt.. Viktor Bjarki Arnarsson fyllir 24 ár í dag!!

TIL HAMINGJU MEÐ DAGINN....!!!!!

Nei nei engar áhyggjur... þetta verður ekkert svoo einmannalegur afmælisdagur... mín mun reyna að vera á við alla fjölskylduna fyrir afmælisbarnið ... !!!

Fleiri fregnir af hátíðarhöldunum á morgun ... mission dagsins er að reyna að finna einhvern veitingastað í bænum sem við erum ekki nú þegar búin að prufa ...

Kveðjur yfir hafið

Með götukortið að vopni

2007-01-19T18:59:00.000+01:00

Það að búa í útlöndum eða réttara sagt að byrja að búa í útlöndum er mjög krefjandi fyrir líkama og sál. Það þarf að redda öllu og pínulítið eins og að byrja lífið frá grunni. Ný kennitala, nýr bankareikningur og svo framvegis.
Viktor er í rosalegu æfingaprógrammi og því dauðþreyttur á kvöldin en þetta er allt að komast inn í hversdagslega rútínu. Álagið verður vonandi minna þegar undirbúningstímabilinu er lokið, ekki tvær þriggja klukkutíma æfingar á dag eins og núna. Spinning er í miklu uppáhaldi hjá Norrmönnunum og því er Viktor orðin frekar þreyttur í rassinum eftir sætin hehehe... en fékk samt proffesional hjólabúning frá félaginu (samfestingur úr sundbolabúning, bráðum orðin löglegur fyrir Tour de France hjólakeppnina hahaha) enda mun Spánarferðin hans einkennast af miklum hjólaferðum að sögn þjálfarans.
Allt sem fyrir augum ber hér í lopasokklandi er nýtt fyrir okkur skötuhjúum og því gætir vissarar hræðslu við það eina að fara út í búð og kaupa í matinn. Maður er alltaf hræddur um að gera eitthvað vitlaust og leggur sig allan fram við að falla inn í hópinn. Það eru þó eitthver vandkvæði bundin við það þar sem hvorugt okkar á Fjallraven bakpoka eða gönguskó eins og allir landsmenn hér klæðast. Ekki miklar líkur á því að við fjárfestum í því í bráð. Einnig virðast gönguskíði vera álíka algengur fylgihlutur og handtaska hér á bæ.
Í dag fórum við í skoðunarferð um Osló með leiðarkort að vopni til að finna út hvar íbúðirnar sem við ætlum að skoða á morgun eru staðsettar... samhæfing okkar að finna leiðina var með eindæmum góð og hverfin sem við skoðuðum lofuðu góðu. Á morgun er svo planið að skoða 3 íbúðir í Osló og eina í Lilleström á sunnudaginn. Allir að krossa putta fyrir okkar hönd því hótelvistin er orðin frekar leiðigjörn.
Venligst hilsen

Biiingo....

2007-01-17T16:08:00.000+01:00

Fann kaffihús! Það var bara hið notalegasta þrátt fyrir a.m.k barnaflóð og vagnaflóð í anddyrinu. Hef hingað til ekki lagt það í vana minn að fara ein á kaffihús... en alltaf er eitthvað fyrst og hef það á tilfinningunni að þetta sé ekki í síðasta skiptið!!! Lofa samt að ég muni aldrei (ég endurtek aldrei!!) fara ein í bíó... held að það fari mér ekki! eða hvað?!

Halli.. þú hefur rétt fyrir þér, það er voða lítið entertainment í krummaskurðinum enda göturnar alltaf tómar klukkan eftir klukkan 9 á kvöldin... en í gær komumst við að því hvar allir bæjarbúar halda sig á kvöldin... í Bingó!!!!! Hér er sko rísastór bingósalur sem er sko mega pró... með tölvum fyrir alla og alles!! Stærsti Bingósalur sem ég hef séð...þó hef ég nú ekki mikla viðmiðun enda var leikurinn Bingó í tísku fyrir mína tíð.... og ég sem hélt að þetta væri nær útdautt en viti menn...!! Ekki samt gera ykkur neinar vonir um að við förum að taka þátt í þessu enda er planið að flýja í siðmenninguna innan skamms... Bingóið verður að bíða í nokkur ár !!

Norsku kunnátta okkar fer fram úr björtustu vonum... erum samt ekki farin að tala saman á norsku.. gefið okkur svona tvær vikur á verður það komið! Verð samt að viðurkenna að norskan fer Viktor frekar illa... og það á hann sameiginlegt með öllum karlmönnum! Norska fer karlmönnum bara ekki vel!! Það ætti að búa til nýjan hreim fyrir karlmenn í þessu landi... bara svo þeir geti haldið aðeins í karlmennskuna!!

Jæja þetta er nóg í bili.. Lofaði pabba að þetta yrði ekkert dagbókar blogg... honum finnst það eitthvað corny!

Norskukennsla og kaffihusaleit

2007-01-16T16:15:00.000+01:00

Gaman að sjá hversu margir hafa fundið síðuna... loksins getur maður bara skrifað fyrir fólkið sem manni langar að lesi eitthvað eftir mann... minni pressa hehehe!

Við þurftum að skipta um hótel í gær og Viktor var á æfingu frá 8 um morguninn til hálf sjö um kvöldið.... !! Duglegur strákur í klukkutímapásunni milli æfinga er félaginn í norsku kennslu... segist vera bestur í bekknum. (kannski ekki skrýtið þar sem hann er með áströlum og serbum í bekk)

Ég rölti því ein um Lilleström í gær með allar okkar veraldlegu eigur á herðunum... okí of sterkt til orða tekið! Hótelið tók enga ábyrgð á farangrinum okkar þannig að ég var með tölvuna, símana, myndavélina og allt svoleiðis dót!

Ég leitaði að kaffihúsi út um allt til dægrastyttingar og eftir endalausa leit endaði ég inní á kaffihúsi með bara fólki 70+ og var nota bene inní verslunarmiðstöðinni! Já engin notaleg kaffihúsa að finna hér. En ég læt ekki segjast og held ótrauð áfram leit minni. Ef allt kemur fyrir ekki lítur út fyrir að ég væri kannski búin að finna mína köllun hér í Noregi, Stofna kaffihús!
Kannski ekki sniðugt þar sem Lilleström virðist vera bær með fjölskyldufólki og elllilífeyrisþegum! Eitt og eitt ungt par á okkar aldri á stangli en ójú... þá er oftast barnavagn með þeim í för.

Er byrjuð á mínum rannsóknum á norska þjóðfélaginu og norrmönnum yfir höfuð .... nánari úttekt á því síðar en hingað til ganga rannsóknir vel!!
Hilsen

Dagur eitt i lopasokkalandi

2007-01-15T13:52:00.000+01:00

Jæja þá er ævintýrið byrjað!
Þetta blogg er ætlað öllum sem okkur þykir vænt um nær og fjær og vilja vita hvað við hjónim erum að gera! Einnig skilst mér að þetta spari símreikning sem er alltaf gott hehehe

Það voru blendnar tilfinningar þegar hjólin á flugvélinni lyftust af flugbrautinni í Keflavík enda ekki á dagskránni að snáu aftur í bráð. Klakinn var því kvaddur með trega í brjósti en tilhlökkun við að takast á við nýjar áskoranir.

Ferðalagið sjálft sem betur fer búið, þar sem magnið af skóm og fatnaði sem ég þurfti endilega að taka með mér var óendanlega þungt. (plús nokkrar þungar sólabækur sem fengu að fljóta með) Það er ekki auðvelt að ferðast ein (á háum hælum í þokkabót) tek ofan fyrir konum sem feraðst einar með börnin sín. Átti sko alveg nóg með sjálfan mig!!

Viktor minn sótti mig auðvitað út á flugvöll og var ég ekki fyrr búin að hrósa honum fyrir að rata á hraðbrautinni þegar við tókum vitlausa beygju til Lilleström... hahaha *karma*

Knús og kveðjur